Welatijanê Dêrsimî ard ziwan ke seba ke pêvajo ya ke Abdullah Ocalan dabî destpêkerdene bimeşo, ganî operasyonê leşkerî bêrê vindartiş û Meclîs de zî komîsyon bêro ronayene.
Rayverê Şarê Kurdî Abdullah Ocalan, 27ê Sibate de Vengdayîşê ‘Aştî û Komelê Demokratîkî’ kerd û nê vengî hîrê û nîm aşm dima xo ra verada. Nê demî de PKK, 5-7ê Gulane de Kongreya xo ya 12. viraşt. 12ê Gulane de biryarê kongreya xo eşkera kerdî û qerarê xo yê xofesîxkerdişî îlan kerd. Hukmat û dewlete heta nika derheqê pêvajoya ke dewam kena de çewt gamê şênberî nêeşta. Seba ke pêvajo ser bikewo, waştişê ronayîşê komîsyonî ame ziwan, la hema komîsyon nêamayo ronayiş û Paketa Darazî ke kewte merîyetî, çîkêkê ke komel pawitêne nêardî ca û paket bi semedê bertekan.
Welatijanê Dêrsimî waşt ke operasyonê leşkerî yê vera Herêma Federalî ya Kurdîstanî demserî bêrê vindarnayene û hepisîyê nêweşî zî bêrê veradayiş. Welatijanê Dêrsimî MA’yî rê qise kerdê.
“Wa verîn nuqteyanê kontrolî hewanê”
Welatijê bi nameyê Haydar Gungorî va ke wa Meclîs seba çareserîye zafêr rol bigîro xo ser û wina va: “Her kuçeyê Dêrsimî de nuqteyê kontrolî est ê. Ma binê sîya çekan de ciwîyenî. Nê de aştî kotî ya? Wa verî nuqteyanê kontrolî hewanê. Badê cû behsê aştîye bikerê. Heta ke nê fermanî nêvurîyê, aştî nîna ca. Ganî hawayê seba qiseykerdişê azadî bêrê aferînayene. Ganî ê sîyasetmedarî ke bêsebeb zere de ameyê hepiskerdiş bêrê veradayene û polîtîkayanê qeyumî zî peynî bibo.”
Gamê şênberî ganî bêrê eştiş
Bedriye Sevîme ard ziwan ke seba ciwîyayîşê pîya merdim aştî wazeno û wina domna: “Ganî ciwananê ma nêmerê. Ma wazenî bazarê karî û ekonomîye başêr bo. La seba ke aştî bibo, bawerî lazim a. Nêbeno ke yew hetî game bierza. Ganî ciwanî nêmerê; ganî dayîkî nêbermê. Ganî êdî kes dej nêancî.”
Alî Arslanî zî ard ziwan ke dima vengdayîşê Rayverê Şarê Kurdî Abdullah Ocalan ra seba çareserîye hêvî zêde bîya û ganî êdî dewlete zî gamê bierza û wina qisey kerd: “Ganî Meclîsî de komîsyonî bêrê ronayene û hepisîyê nêweşî bêrê veradayene. La nê çarçeweyî de bawerîya şarî bi dewlete nêmenda. Çîke dewlete samîmî nêasîyena. Destûrê Bingeyî yo newe de ma wazenî ke ziwan û nasnameya kurdkî qatî bêro mîsogerkerdene. Ma bi pêvajo kêfweş ê, la ma wazenî ke gamê pratîkî yê dima nê pêvajo zî bivînî. Bahçelî vano; ‘Ma bira yê’. Erdogan zî eynî çî vano, la ganî pratîk de gamê şênberî bêrê eştene.”
Cemîl Bagaçî ard ziwan ke wexto ke vengdayîşê Rayverê Şarê Kurdî Abdullah Ocalan ra nata dewlete gamê verçimanî nêeşta, bîyo semedê şik û gumanan û wina qedîna: “PKK’î seba çekveradayîşî gamê avzelî eşta. Nê de verpirsîyarî kewena milê dewlete, la nêkewena milê herekete. Ganî dewlete bê şert û merc hepisîyê nêweşî serbest verado. Ez nêzdîbîyayîşê dewlete bi gumanî vînena. Lazim o ke na mesele Meclîs de çareser bibo.”
