Welatijê ke Amed de beşdarî kombîyayîşê şarî bîyê vengdayîşê Rayberê Şarê Kurd Abdullah Ocalan ercaneyê û waştê ke pêvajo bi awayêkî aşkera bêra averberdene û vatê: “Vîr û bawerîya ma bi vengdayîşê Serek Abdullah Ocalan est o.”
Heyetê Îmraliyî yê DEM Partîye 27ê Sibate de vengdayîşê “Aştî û Komelo Demokratîk” yê Rayberê Şarê Kurd Abdullah Ocalan raya pêroyî rê aşkera kerd. Dima zî vengdayîşo tarîxî ra Kurdistan û Tirkîya de hetkarîye dewam kenê. DEM Partî, DBP û TJA ser avzelî û maneyê vengdayîşî bi şarî ra kombîyayîşan virazenê. Kombîyayîşê şarî yê Amedî zî domyenê. Salonê Dawetî yê Peyasê Amedî de kombîyayîşê şarî virazya. Xeyle welatij beşdarî kombîyayîş bîyê. Welatijê ke beşdarî kombîyayîşê bîyê derheqê vengdayîşê Rayberê Şarê Kurd Abdullah Ocalan de ajansê ma rê qise kerd.
‘Seba ke rayîrê demokrasîye aver şîro dewlet game bierza’
Welatijê bi nameyê Mîrze Korkmaz da zanayîş ke na pêvajoya aştîye do seba şarê Kurdistanî, seba statuyê şarê kurd ameyox de netîceyê weş bivejo werte û wina va; “Seba kurd bi kulturê xo, ziwanê xo ser herra xo de bi awayêkî azad biciwo pêvajoya aştî avzel a. Na pêvajo pêroyîya dinya de veng da. Ez bawer a şarê Kurdistanî do ewro ra pey zî pêvajo ra wayîr bivejo, pêvajo ver bi serkewtişî şîro. Seba ke aştî pê bêra, rayîrê demokrasîye bibo, şarê Kurdistanî teberê welatî agêrê ser herra xo wa dewlet zî gaman bierza. Bi Serekê Şarê Kurd ra bi awayêkî aşkera pêvîşan bikera, hetê Rayberê Şarê Kurd Abdullah Ocalan azad nêbo problem çareser nêbeno, her kes zî zaneno.”
‘Heqê kurdan bi Qanûno Bingeyî bêro qebulkerdene’
Welatij bi nameyê Wahap Şeker zî ard ziwan ke vengdayîşê Abdullah Ocalan gamêka baş û pozîtîf a û wina domna: “Seba şarê kurd wa ser xêrê bo, seba ke aştî pê bêra lazim o dewlete gaman bierza, heqê kurdan Qanûno Bingeyî de qebul bikero.”
‘Ma nê vengdayîşê Serekî bi erc vînenê’
Welatij Gulistan Akkuş zî aşkera kerd ke vengdayîşê Rayberê Şarê Kurd Abdullah Ocalan bi erc bî û wina dewam kerd: “Vîr û bawerîya ma pê est a. Ma sey şar zaf zilm û zordarî dîyê, dej ant la hewna zî ma vanê aştî. Ma nêwazenê êdî gonî birijyo. Ganî Dewlet, ser Rojawan hêrişê xo bivindarna, hepsîyê ma biverada, nasname, kultur û ziwanê ma qebul bikero ke aştî pê bêro. No ser Meclîs komîsyon bêro awan kerdene.”
‘Bawerîya ma bi dewleta tirk nîna’
Welatij bi nameyê Ayten Koyunkaya destnîşan kerd ke bawerîya înan bi dewleta tirk nîna.
