Welatijanê Amedî derheqê Komployê 15ê Sibate yê mîyanneteweyî yê vera Rayberê Şarê Kurdî Abdullah Ocalanî îfade kerd ke no komplo do bi yewîya kurdan binkewo û vat: “No komplo vera şarê kurdî ameyo kerdene û do bi yewîya kurdan zî binkewo.”
Hêzê hegemonî seba ke astengîyanê vernîya xo hewanê vera Rayberê Şarê Kurdî Abdullah Ocalanî plansazîya komployî kerd. Rîyê komployî mîyandewletî ke rolê xeylê dewletan tede est bi, Abdullah Ocalan 9ê Teşrîna Verêne ya 1998î de Sûrîye ra vejîya û verê xo da Ewropa. Dimayê 130 rojan 15ê Sibata 1999î de hetê hêzanê mîyandewletî ra encamê komployêkî de Kenya de ame girewtene û teslîmê Tirkîya ame kerdene. Girewtişê Abdullah Ocalanî seba şarê kurd û dostanê kurdan sey “Roja sîyaye” ame pênasekerdene û Kurdîstan û xeylê cayanê dinya de şarê kurd û dostê înan vejîyayê qadan û dest bi çalakîyan kerd. 15ê Sibata 1999î ra hêrs û nerazîbîyayîşê kurdan ê vera komployê mîyanneteweyî dewam keno.
Welatijanê Amedî zî derheqê komployê mîyanneteweyî yê 15ê Sibate de reaksîyonê xo mojna û vat: “No komplo hema zî dewam keno. Hêrişê vera şarê kurd, çinhesibnayîşê nasnameyê kurdan, nimûneyê nê komployî yê. Kurdî ewro hişyar bîyê û yewîya înan do nê komployî binfîno. Ma êdî zanê û do yewîya ma vera nê polîtîkayan serkewa.”
