Welatijanê Dêrsimîjî dîyar kerd ke demanê peyênan de şuxulnayîşê madeyan û çetebîyayîş vêş bîyo, vera nê reaksîyon mojna û wina vat: “Dewlete destûr dana made û çetebîyayîşî. Seba ke ciwanê ma şorişgêrî nêkerê dewlete madeyan dana înan. Ganî şarê Dêrsimî vernîyan nê kerdişan bigîro.”
Dêrsim de demanê peyênan de şuxulnayîşê madeyan û çetebîyayîşî vêş bîyo û şarê Dêrsimî vera nê bi endîşe yo. 10ê temmuze de bi pêşengîya Platformê Demokrasî û Kede yê Dêrsimî bi sloganî “Ma made, çetebîyayîş û her tewir şîdetî rê vanê nê” rayîrşîyayîşêk organîze kerdbi.
Ajansê Pîrha seba na rewşe welatijanê Dêrsimî reyde qisey kerd.
‘Şarê Dêrsimî ganî vera nê kerdişanê dewlete bibo asteng’
Welatij Huseyîn Ayrilmaz dîyar kerd ke bi serran o ciwananê Dêrsimî ser o yeno kaykerdene û wina vat: “Wazenê ciwananê Dêrsimî mi şuxulnayîşê madeyan kung bikerê û problemanê rastan ra dûrî bifînê. Demanê peyênan de nê kerdişê açarîyayê şîdet û çekan. Hewl danê ke Dêrsim de çetebîyayîşêk aver berê. Wazenê Dêrsimo ke bi tarîx, kultur û erjanê xo yeno şinasnayene, êdî bi çîyanê xiraban bêro şinasnayene. Ganî şarê Dêrsimî nê damanê ke wazenê ciwananê ma bidefnê, înan rê bibê asteng.”
‘Êdî ciwanê ma madeyan şuxulnenê’
Findik Akaygun Dêrsim de şuxulnayîşê made û çetebîyayîşî rê şaşbîyayîşê xo dîuar kerd û wina vat: “Ciwananê ma heta ewro kard û çeke nêşuxulnayêne la êdî înan ser o zî est ê. Verê ciwananê ma nêverdayêne kes madeyan bişuxulno la êdî ê bi xo kenê. Verê Dêrsim zaf pak bi la nika çi çîyê pîsî est ê anê zere.”
‘Ganî ma domananê xo bipawê’
Welatij Kazim Akaygunî dîyar kerd ke dewlete destûr dana made û çetebîyayîşî û wina dewam kerd: “Seba ke ciwanê ma şorişgêrî nêkerê dewlete madeyan dana înan. Verê zî na polîtîka kerdêne, nika reyna kena. Verê ma keyeyê xo reyde şînayêne şêrê awe ver de ronişê, la nika seba ke destê her kesî de çek est o, ma tersenê şîrê. Ganî ma domananê xo reyde qisey bikerê, ganî ma înan bipawê. Kes vengê xo nêvejeno!”
‘Kesê ke domananê ma bi jehr kenê, eşkenê bêrê girewtene’
Welatijan ra Bedrîye Sevîm dîyar kerd ke Dêrsim verê cayêko pak bîyo la nika sey verî nîyo û însanî êdî tersenê bigêrê.
Sanîye Îldenîze zî îfade kerd ke vêşbîyayîşê şuxulnayîşê made û çetebîyayîşî sucê dewlete yo û qiseykerdişê xo wina qedêna: “Hêzê ewlekarî yê nê şaristanî est ê. Demo ke ma Xarpêt ra yenê Dêrsim ma panc reyî kontrolî ra vîyarenê. Dêrsim de her kuçe de kamerayê mobeseyî est ê. Êyê ke domananê ma bi jehr kenê dîyar ê, eşkenê bêrê girewtene.”
