Wendekarê Unîversîteya Dîcle bi munasebeta 1ê Gulane Roşanê Karker û kedkaran a Dinya çalakîya ‘Kursîya azad’ viraşte. Wendekaran dîyar kerd ke têkoşînê kede û azadî pêwa girêdayeyê û vat: “Bi ruhê na roje ma mil bidê milê yewbînî û biresê serkewtene.”
Wendekaranê Unîversîteya Dîcle bi munasebetê 1ê Gulane Roja Karker û kedkaran a Dinya kampusê Unîversîte de ameyê têhet. Wendekaran bi çalakîya “Kursîya azad” bale ante serê heqanê kedkar û wendekaran. Wextê çalakî de dovîzan de nuşteyê “Sosyalîzm de israr merdimbîyayîş de israr o”, “Vera kedwerî cuyêka komînal”, “Keda ma heqê ma yo” û “Biciwîyo 1ê Gulane” ser o nuşte bî ameyê akerdene.
‘1ê Gulane roja awankerdişê ameyoxî ya’
Hasan Karsûyî bi kurdkî qisey kerd û dîyar kerd ke 1ê Gulane seba heme şar û sinifanê bindest rojêka tarîxî ya û bale ante serê muhîmîya têkoşînê û wina vat: “Hewceyo ke merdim tarîxê na roja xoverdayîşî baş bido naskerdene. No têkoşînî ewro dest pê nêkerdo; têgêrayîşê ciwananê 68î ra heta ewro dewam keno. Merdim ganî serê na têkoşînê ameyoxê xo awan bikero.”
‘No têkoşîn seba heqanê meşrûyan o’
Hasan Karsû îfade kerd ke na roje eynî wextî de seba heqanê ziwan, nasname û estbîyene yo: “Seba şarê kurdî nê çî esasê; wayîrvejîyayîşê heqê şarê xo, pawitişê ziwanî û estbîyayîşî xo, no têkoşînê hetê ekonomî û heqanê demokratîkan de seba ma heqê meşrû yê.”
Vengdayîşê têkoşînê hemparî
Hasan Karsû peynîyê qiseykerdişê xo de dîyar kerd ke tewlî heme teda û tehdîdan, wendekarî unîversîte do apey game nêerzê û vat: “Karker, wendekar, dewij û karkerê fabrîqayan; ma heme binê banê têkoşînê de resenê yewbînî. Amancê ma heqê bingeyinê, ma do sey wendekaranê kurdî xoverdayîşê xo xurtêr bikerê û komelêk demokratîk û aştîyane awan bikerê. Bi ruhê na roje, ma mil bidê milê yewbînî û biresê serkewtene.”
Dima ra xeylê wendekarî vejîyayê serê “Kursîya azade” derheqê muhîmî û têkoşînê 1ê Gulane de qisey kerd û bale ante serê kede û têkoşînê karker û kedkaran.
Çalakî bi sloganê “Biciwiyo 1ê Gulane” qedîya.
