Weqfa Mezopotamya xebatanê xo yê kovaranê Folklora Me û Folklor û Ziman, bi amancê derbaskerdişê sînoran û pawitişê çimeyanê fekî ravurna warê dîjîtalî. Nuştox û rayberê Weqfî Bahoz Baranî folklorî sey “Vîrê Kurdan” pênase kerd û veng da sazgehan ke seba arêdayîşê kulturê fekî lezabez dest bi xebatanê sîstematîkan bikerê.
Weqfa Mezopotamya serra 2017î ra nat 15 hûmarî kovara “Folklora Me” û 6 hûmarî zî kovara “Folklor û Ziman” çap kerdê. Weqfa Mezopotamya seba pawitiş, arêdayîş û resnayîşê folklorê kurdkî yê seba neslanê neweyan gamêka muhîme eşt û eynê demî de xebatanê xo yê folklorî zî dîjîtalîze kena. Nuştox û rayberê Weqfa Mezopotamya Bahoz Baranî derheqê projeyanê weqfî yê neweyan, muhîmîya ziwan û folklorê kurdkî û xebatanê arêdayîşî de ajansê ma rê qal kerd.
‘Amancê ma xebatanê dîjîtalîzekerdeyan resnayîşê her çar parçeyê Kurdîstanî yo’
Bahoz Baranî qiseykerdişê xo de da zanayîş ke xebatê înan ê folklorî serra 2017î ra nat dewam kenê û heta nika 15 hûmarê kovara ‘Folklora Me’ ameyê çapkerdene. Bahoz Baranî îfade kerd ke seba derbaskerdişê sînoran û xo resnayîşê heme kurdanê ke seranserê dinya de ciwîyenê, înan qerarê dîjîtalîzekerdişê xebatanê xo dayo û wina vat: “Na kovare perîyodîk a û serre de çar hûmarê aye yenê çapkerdene. Seba ke ma sînoran derbes bikerê û xo biresnê heme perçeyanê Kurdîstanî û teberê welatî, ma qerarê dîjîtalîzekerdişê kovare da. Bi no hawa, kurdê ke her cayê dinya da ciwîyenê, eşkenê bi rehetî xo biresnê folklorê xo, ey nas bikerê û bibê endamê nê sîstemî ke ma hedre kenê.”
‘Kurdan rê xebatê analîtîk û akademîkî lazim ê’
Bahoz Baranî dîyar kerd ke xebatê înan binê banê di kovaran de dewam kenê û înan ra yew “Folklora Me” ya ke seba weşanayîşê xebatanê arêdayan taybet a. Kovara dîyine ser o zî Bahoz Baranî nê çîyî vatê: “Kovara ma ya bîne zî folklor û ziwanî ser o ya; na kovarêka akademîk û bihakem a. Seba ke kurdî warê ziwan û folklorî de xurt ê, lazim o nê waran de tena xebatanê arêdayîşê ney, meqaleyanê zanistî û cigêrayîşî zî ca bigêrî. Bi no hawa ma eşkenê materyalanê xo yê folklorî ser o kûrêr bifikirî û xebatanê analîtîkan bikerê.
‘Dem vera ma xebetîyeno, ganî ma lez bikerê’
Bahoz Baranî bale ant endîşeya çinbîyayîşê çimeyanê fekî û veng da heme sazgeh û dezgeyanê kurdan ke wayîrê folklarê xo vejîyê. Bahoz Baranî folklorê Kurdkî sey ‘Vîrê Kurdan’ pênase kerd û nê hîşyarî da: “Ziwanê Kurdkî ziwanêko zengîn o û estûno tewr xurt ê na zengînîye folklor o. Çi heyf ke heta nika sazîyêka neteweyî û taybete seba folklorê kurdan nêameya awankerdene.
Nê mîrasê çend hezar serran, ewro zafêrê formê fekî de mendo. Dem vera ma xebitîyeno; 10-15 serran ra pey, beno ke wexto ke ma şêrê dewan ma do çimeyanê fekî peyda nêkerê. Coka mîyanê 15-20 serranê vernîya ma de ganî xebatanê arêdayîşê lezabez bikerê.
Kovare nika ‘folklorakurdi.com’î ser o ya
Bahoz Baranî taybetmendîyanê teknîkî yê dîjîtalî ser o dîyar kerd ke wendoxî eşkenê bi rayîrê telefonanê biaqilan, komputere û tabletan rehetî kovare biwanê û wina vat: “Sîstemê ma de wendoxî eşkenê çekuyan bigêrê û goşdarîya tedeyî bikerê. Na taybetmendîya vengî bi taybetî seba kesanê ke çiman ra astengdar ê, muhîm a. Adresa keyepelê ma ‘folklorakurdi.com’ a. Kesê ke keyepelê zîyaret kenê eşkenê bibê endam û dima ra eşkenê heme hûmaranê kovare bêpere biwanê. Sewbîna ma wendoxanê xo ra wazenê; eke derûdorê înan de kesê ke arêdayîş kene est bê, wa arêdayîşê xo ma rê bierşawê ke ma înan biweşanê.”
