Girewteya kurd Werîşe Muradî Hepisxaneyê Evînî ra seba piştgirîya numayîşanê Îran û Rojhelatê Kurdîstanî mesajêk erşawit. Werîşe Muradî dîyar kerd ke cinî pêşengê nê têkoşînî yê û vat azadîye zerrîya nê komelî de est a.
Girewteya sîyasî ya kurd Werîşe Muradî Hepisxaneyê Evînî ra seba piştgirîya numayîşianê Rojhelatê Kurdîstan û Îranî mesajêk erşawit.
Werîşe Muradî dîyar kerd ke paştî dana çalakîkeran û wina vat: “Numayîşî ke şaristananê cîya-cîyayanê Îranî de, bi taybetî yê Îlam û Kirmanşahî, netîceyê rasterast ê sîstemî yo ke cuye û rûmetê însanan bi top, çeke, hepis û dardekerdişan rehîn gêno. Qirkerdişê Melekşahî, nîşaneyê bêrehm û bêçareyîya nê sîstemî ya û îsbat beno ke teda û gonî ne meşruîyet anê ne zî îstîqrar; eksê ci îsbat keno xoverdayîşo kolektîf û îradeyî newera awan kenê.”
‘Cinî pêşengê têkoşînî yê’
Werîşe Muradî îfade kerd ke cinî pêşengê têkoşînî yê û vat: “No proses, dewamê qutbîyayîşê tarîxî yê ‘Jin jîyan, azadî’ yo; no qutbîyayîş, komel hema despotîzma dînî ra hem zî qutubanê peysermende yê monarşî ra vîyarnayê. Tena sey sembol nê, sey hêzêk ke hem sîstemê hêzê pederşahî û otorîterî ra hesab persenê, cinî pêşengê nê têkoşînî yê.”
Temamê mesajê Werîşe Muradî wina yo:
“Nê qiseyî mabênê dêsanê hucreyan de ke vengê dardekerdiş û tedayî tim gulbang dano, yenê nuştene. Hêz, vano qey ke eşkeno bedenan bierzo hepis, vengan bêveng bikero û îradeyê şarî bişikno; la tarîxî zaf reyan mojnayo ke tu dês, tu uşîre û layî nêeşkayê adirê xoverdayîşî hewna bikerê.
Numayîşî ke şaristananê cîya-cîyayanê Îranî de, bi taybetî yê Îlam û Kirmanşahî, netîceyê rasterast ê sîstemî yo ke cuye û rûmetê însanan bi top, çeke, hepis û înfazan rehîn gêno. Qirkerdişê Melekşahî, nîşaneyê bêrehm û bêçareyîya nê sîstemî ya û îsbat beno ke teda û gonî ne meşruîyet anê ne zî îstîqrar; eksê ci îsbat keno xoverdayîşo kolektîf û îradeyî newera awan kenê.
‘Ne despotîzmo dînî ne monarşî; Jin, Jîyan, Azadî’
No proses, dewamê qutbîyayîşê tarîxî yê ‘Jin jîyan, azadî’ yo; no qutbîyayîş, komel hema despotîzma dînî ra hem zî qutubanê peysermende yê monarşî ra vîyarnayê. Tena sey sembol nê, sey hêzêk ke hem sîstemê hêzê pederşahî û otorîterî ra hesab persenê, cinî pêşengê nê têkoşînî yê. Estbîyayîşê cinîyan ê herême tena hemsencîya hêzê serûbin nêkeno eynê wextî de mojneno ke azadîye zerrîya komelî de est a û tu dîktator, tu qiral û tu sîstemê apeymendeyî nêeşkenê nê bidestfînê.
Şarê Kurdîstanî, tarîxî ra nat demê krîtîkan de, bi rêxistinkerdişê komelkî û vîrê xoverdayîşê gandar, her merkezê hêzî de bi hewayêko xoser û zanaye, îsbat kerdo ke demêko tewr kilm de herême de ca girewto. Têkoşînê Kurdîstanî, bi îradeya kolektîf, tecrubeyo tarîxî yê xoverdayîşî û toranê gandar ê komelî reyde şekil girewto; no têkoşînê azadîye sey sozêk nê, sey kerdişî vîneno. Na cografya mojnayo ke tarîx bi mesajanê ke yenê ferzkerdene, bi rîwayetanê nostaljîk ê qiralîye nê; bi kerdiş, xoverdayîş û fedakarîye yeno nuştene.
‘Azadîye zereyê nê komelî de est a’
Ewro mesele agêrayîş nîya, ne agêrayîşê textî ne zî newera berardişê sîstemê îslamîstî. Mesele, vîyartişê her di formanê hêzanê apeymendeyan o. Rayberîya nê rayîrê destê şarî de ya, ne qiralanê vîyarte ne zî rayberanê ewroyî de ya. Ma komelêkî ra bawer kenê ke zafvengî, demokratîk û wayîrê îrade yo ke bi beşdarîya heme bawerî û etnîk û şaran qederê xo dîyar keno.
Azadîye tam zereyê nê komelî de est a û tu hepisxane, tu dardekerdiş, tu teda û tu hêz, nêeşkeno no proseso tarîxî vindarno.”
