Şaredarîya Amedî ya Şaristanê Girdî 15ê Gulane Roşanê Ziwanê Kurdî de xeta WhatsAppî ya ALO Kurdî dekerde xizmetê şarî.
Şaredarîya Şaristanê Girdî ke çarçewaya şaredarîya sosyale de zafziwanî esas gêna û xizmetan kena, yewa bîne îlaweyê xebatanê xo kerd. Serekîya Daîreya Karanê Kultur û Sosyalan Mudirîya Pawitiş û Averberdişê Ziwanan, seba şarê ke wazenê nameyê kurdkî, menuyanê restoranan, tabelayanê dikanan, dawetnameyanê veyveyan û nuşteyanê heda mezalan bi kurdkî binusê, xeta ALO Kurdkî dekerde xizmetê şarî. Personelê pispor ke Mudirîya Şubeyê Pawitiş û Averberdiş ê Ziwanan de wezîfedar ê, do nuşteyê ke numreyê 0537 744 55 87 yê WhatsAppî rê yenê, cewab bidê înan.
‘Ma do hemê waştişan rê cewab bidê’
Mudirê Şubeyê Pawitiş û Averberdişê Ziwanan Tahir Baykuşak ke derheqê xeta WhatsAppî de malumat da, bale ant ke bi xeta ALO Kurdî, ê do cehd bikê ke hemê waştiş û persanê şarî yê derheqê ziwanî de cewab bidê û wina va: “Mesela kesê ke wazenê gedeyanê xo rê nameyêko Kurmancî ya zî Zazakî bidê, ê şênê mana û nuştişê nameyan xeta ma ya WhatsAppî ra binusê ma rê. Sewbîna, Amed de zaf esnafê ma nameyê dikananê xo kurdkî şuxilnenê, labelê bi îmlaya xeletî nusenê. Eke nê kesî wazenê ke nameyê dikananê xo bi îmlaya raşte binusê, wa xeta ma rê binusê, ma do înan rê cewab bidê.”
Baykuşakî ke îfade kerd şaro ke wazeno dawetnameyanê organîzasyonanê xo ke do bêrê virastene, bi kurdkî hazir bikê, ê şênê ALO Kurdî ra desteg biwazê, wina dewam kerd: “Restorananê Amedî de menuyî vêşêrî tirkî yê. Ma wazenê restorananê bajarî de tirkî û îngilîzkî ra teber, menuyanê Kurmancî û Zazakî zî bibê. Eke restoranî ma ra biwazê, ma do seba înan menuyanê kurdkî hazir bikê.”
