Hêzanê Sûrîyeya Demokratîke (HSD) eşkera kerd ke hukmatê demkî yê Sûrîye reyde peymanêk entegrasyonî ser o bi qedeme ya hêzanê îdarî û leşkerî ameya îmzakerdene.
Eşkerayîya Merkezê Resnayîşî yê HSD’yî de wina ame vatene: “Mabênê hukmatê Sûrîye û Hêzanê Sûrîyeya Demokratîke (HSD) de çarçewaya peymanêka hîra ya seba entegrasyonî bi qedeme ya hêzanê îdarî û leşkerî ya hetan de peymanêk ameye îmzakerdene.”
Detayê peymana ke mabênê HSD û Şamî de îmza bîya wina yê:
“Na peymane hukum dana ke hêzê leşkerî xo nuqteyanê şerî ra biancê, hêzê ewleyî yê girêdayeyê Wezaretê Karanê Zereyî merkezê şaristananê Hesekê û Qamişlo de bêrê bicakerdene, prosesê entegrasyonê hêzanê ewleyî herême de do bêro destpêkerdene, binê banê tumenêke de ya ke bi wezîfeyê Walîtîya Helebî yena awankerdene, tumenêka leşkerî bêra awankerdene ke 3 tugayê girêdayeyê HSD’yî û Kobanî ra zî tugayêk ano pê.
Peymane eynî wextî de dîyar kena ke sazgehê Îdareyê Xoserî binê banê sazgehanê Dewleta Sûrîye de bêrê entegrekerdene û personelê aye yê wezîfedarî bibê kadro.
Ney reyde, peymane heqê perwerde û sîvîl ê şarê kurdî garantî kena û agêrayîşê ê kesan aman kena ke ca û waranê xo ra bîyî.
Amancê na peymane o yo ke hemkarîya mabênê hetanê têkildaran xurt bikero, cehdkerişanê seba reyna awankerdişê welatî bikero yew, yewîya erdê Sûrîye bîyaro ca û herême de entegrasyonêk awan bikero.”
