Kampanyaya mektubî hetê Yewîya Cinîyanê Kurdî ya Neteweyî ra ame dest pêkerdene û partîyanê sîyasî yê Kurdîstanî hemînan bi îmzaya xo paştî daye, sazgehê eleqedar ê Neteweyanê Yewbîyayeyî rê ame erşawitene.
Çarçeweya kampanya de ke nêzdîyê 3 hezar û 500 îmza ameya komkerdene, 150 îmzayan partîyanê sîyasî yê giranîya xo yê temsîlîyêtî est a Neteweyanê Yewbîyayeyî rê ame erşawitene. Mektube de ame waştene ke statuya sîyasî yê Rojava bêro naskerdene, dorpêçê serê Kobanî bêro wedaritene û destkewteyê cinîyan yê Sûrîya bêrê pawitene.
Mektube sere de Sekreterê Pêroyî yê Neteweyanê Yewbîyayeyî Antonio Guterres sazgeh û rayedaranê payeberzî yê Neteweyanê Yewbîyayeyî rê ame erşawitene. Mîyanê sazgehanê ke mektube teslîmî înan ameyê kerdene de Komîserîya Heqanê Merdiman ê Neteweyanê Yewbîyayeyî, Dîrektorîya Pêroyî yê Ofîsa Cenevre yê Neteweyanê Yewbîyayeyî, Temsîlkarê Cenevre yê Yewîya Cinîyan ê Neteweyanê Yewbîyayeyî û Masaya Sûrîya yê Neteweyanê Yewbîyayeyî est ê.
Eşkerayîya Yewîya Cinîyan de ame eşkerakerdene ke mektube tena ne hewldayîşê komelê sivîl ê, eynî wextî de bi paştîdayena partîyanê sîyasî yê Kurdîstanî û xeylê sazgehan ra ame hedrekerdene.
Mektube de ame eşkerakerdene ke prosesê çareserîya sîyasî de ke Sûrîya de dewam kenê, ganî heqê sîyasî û neteweyî yê şarê kurdî qanûno bingeyin de bêrê garantîkerdene. Seba çareserîyêk domdare zî ame dîyar kerdene ke ganî statuya sîyasî ya Rojava astê mîyanneteweyî de bêro naskerdene.
Mektube de ame waştene ke dorpêçê serê Kobanî û dorûverê aye bilez bêro wedaritene. Seba pawitişê sivîlan, akerdişê korîdorê însanî û çarçeweya huqûqê merdimî yê mîyanneteweyî de Neteweyanê Yewbîyayeyî ra ame waştene ke bilez gaman bierzê.
Sewbîna seba astengkerdişê hewldananê vurnayîşê awanîya demokrafîk ê herêmanê kurdan û pawitena heqanê merdimî vengdayîş ame kerdene.
Yewîya Cinîyanê Kurdî a Neteweyî dîyar kerd ke garantîkerdişê qanûnê bingeyin ê heqanê neteweyî, kulturî û sîyasî yê şarê kurdî şertê bingeyin ê aştîyê domdare yê.
