Kaykerê tîyatroyî Abdullah Tarhan û deyîrbaz Haydar Gunêşî vat ke dewletanê mîyanneteweyî waşt ke bi nê komployî şarê kurdî bê rayber verdo û têkoşînê ci bişiknê la nêzanayêne ke têkoşînê şarê kurdî do hende girs bibo.
Tarhanî wina vat: “No komployo ke çend dewletanê hegemonîkan hemverê têkoşînê kurdan de kerd, komployêko rêze ra nîyo. Amancê ci rijnayîşê yew rêxistinê nêbi. Înan waşt ke neteweyêk binî ra orte ra wedarnê û Rojhelatê Mîyanênî de sîstemêko kirêt kurdan ser o awan bikerê. Dîyî ke do Rojhelatê Mîyanênî de vurnayîşan rindan bikerê, dest bi komployî kerd. La bi ser nêkewtî.”
Tarhanî derheqê Rojava qisey kerd û wina vat de vat: “Na rey zî waşt ke bi hewayêko nimitkî komployî Rojava ser o rayra berê û destkewteyanê ke şarê kurdî 52 serranê peyênan de girewtê, înan çin bikerê. La se ke verînê ma vanê ‘hesabê keyeyî û sûkî têmîyan meke’ komplo nêresa amancê xo. Bi saya hêz, sîyaset û şerkerîya kurdan ê ke 14-15 serrî yo Rojava de şer kenê û seba dinya bîyî nimûne, komplo ame puçkerdene.”
Tarhanî vat: “Tu hêzêk vîr û bawerîya şarê kurdî ra hêzdarêr nîyo. Çeko tewr girs ê kurdan vîr û bawerîya ci ya erdê ci û bi xo est a.”
Gunêşî zî wina dest bi qiseykerdişê xo kerd: “Bi nê komployî waştêne ke serewedaritişê 29. yê şarê kurdî bin fînê û rêxistinî tasfîye bikerê. Amancê dewletanê mîyanneteweyîyan temînkerdişê menfeatanê xo bî. Waştêne ke kurdan bikerê binê tesîrê xo. Çîyo tewr muhîm no bî ke kurdan yewîya xo mojnaye û ganî ma na yewîye girsêr bikerê. Her çar parçeyê Kurdîstanî yew ê û ma do heme komployan puç bivejê.”
Gunêşî qiseykerdişê wina qedêna: “Ma 6 bîyî, nika ma bîyî bi mîlyonan. Ê ke nêeşkayî 6 kesan çin bikerê, nêeşkenê mîlyonan zî çin bikerê. Bingeyo ke ameyo awankerdene kes nêeşkeno xirab bikero. Êdî kurdî, kurdê kesî nîyê, kurd, kurdê xo yê.”
