Bazarê Kel-melanê Kehen ê Amedî de heme çî est o. Şefeqê roje de dest pêkeno û lez qedîyeno. Her çend seba bazarî eleqe est bo zî, rotoxê bazarî riyê cayî ra razî nîyê û wazenê şaredarî seba înan cayêk viraza.
Taxa Şehîtlîkî ya qezaya Yenîşehîrî ya Amedî de her hewte roja yewşeme Bazarê Kel-melanê Kehen yeno ronayene. Bazarî de kincê kehen û neweyî, materyalê elektronîk, sol û xeylê çîyî yenê rotiş. Rotoxî saete 23:00î de şonê malzemeyanê xo ronenê û her roja yewşeme serê sibayî saete 06:00î de dest bi rotişî kenê. Rotoxî serê sibayî lez paweyê mişterîyanê xo yê. Bazaro ke şefeqî dest pêkeno, renginîya xo mojneno la heto bîn ra zî rewşa feqirîye ya şarî mojneno. Her çend eleqeya welatijan seba bazarî est ba zî rotoxî riyê problemê cayî ra xeylê bi gerre yê.
Rotoxanê bazarî zor û zehmetîyê xo ma rê îfade kerdê.
Gerreyê xo şaredarî rê keno
Ramazan Aktaş ke bazar de rotoxî keno îfade kerd ke 150 serrî yo Tirkîya de bazarê winasînî est ê û vat ke bazarê kel-melanê kehen ê gird ê 3. Amed de bi la riyê problemanê krîzê aborî no sey verî nîyo. Aktaşî da zanayene ke astengîyê berê sînorî zî tesîrê karê înan kenê. Aktaş gazinanê xo şaredarî rê wina keno: “Nika zî û demê qeyûmî de zî seba nê bazarî tu çîyî nêameyê kerdiş. Ma veng danê ke wa şaredarî seba ma cayêk awan bikerê. Seba ke cayê ma çin o, ma bêçare yê saete 2’yî şewe de bêrê tîya de vinderê. Eke ma rê cayêk virazê ma do wina perîşan nêbî.”
‘Hamnanî germ o, zimistanî serd o’
Osman Koyun o rotox zî derheqê bazarî de qisey kerd û wina vat: “Her însan goreyê rewşa xo eşyayan ano û roşeno. Hamnanî ma binê tînce de manenê, zimistanî zî ma binê varanî de manenê. Ma nêwazenê mîyanê qilêr û çope de nê karî bikerê.”
‘Zimistan zehmetîye dano ma’
Dîyadîn Aslan zî 30 serrî yo karê bazarê kel-melanê kehen keno û nê çîyan vano: “Bi serran o ma nê karî kenê. Ez saete 4î de yena tîya. Seba ke ma werd berê keyeyê xo ma bêçareyî na rewşe de bixebitîyê. La reyna zî qîmê ma nêkeno. Seba ke cayê ma çin o, ma zimistanî teber de şertanê zehmetinan de xebitîyenê.”
‘Ez bêçareyî ra yena tîya de xebitîyena’
Fatma Durmaz ke bazar de rotoxîye kena bale ant xebata cinîyan a tîyayî û vat: “Ez teber ra cilan kom kena û ana tîya de roşena. Seba ke rewşa aborîya keyeyê ma xirab a, ez bêçareyî ra yena xebitîyena. Rojanê ke hewa serdin bibo, ez zaf eciz bena. Cinîyê ke tîya de xebitîyenê, eyn problemî ciwîyenê. Ca nêdanê ma û cayê ma çin o. Cayê ke herînenê ge-ge ma rê yenê girewtene.”
‘Wa şaredarî ma rê cayêk viraza’
Metîn Turk ke bazar de rotoxîye kena vat: “Şaredarîya ma soz da ma ke do ma rê cayêk viraza. La sozê xo nêard ca. Wa sozê bîyarê ca. Eşyayê ma pêro binê varanî de hî benê û nêroşîyenê. Tena waştişê ma o yo ke wa êdî seba ma cayêk bêro viraştene.”
