Dema malbateke Kurd ku ji 8 kesan pêk dihat ji geştê vedigeriya, ji ber axaftina xwe ya bi Kurdî bi êrişa nîjadperestan re rûbirû ma.
Li gundê Kîsecîk ê navçeya Çamliyayla ya Mêrsînê dema malbateke Kurd ku ji 8 ferdan pêk dihat ji geştê vedigeriya, bi hinceta axaftina bi Kurdî bi êrişa nijadperest re rûbirû ma. Li gorî nûçeya Ajansa Mezopotamyayê; êriş duh saet di 17.30an de hate kirin. Hat zanîn ku keyayê Kîsecîkê jî di nav de, komeke nijadperest êrişî malbatê kir. Di têketina gund de wesayîta malbatê ya bi plakaya 01 ECL 92yê hate sekinandin û ji ewil tundiya devkî li malbatê hate kirin. Koma nijadperest piştre jî ji malbatê re got “Ev der Komara Tirkiyeyê ye hûn çawa bi Kurdî diaxivin” û nijadperestan li malbatê da.
Malbata ku di nav de jin û pitikeke 3 mehî jî hebû, piştî êrişê bi derfetên xwe çû Nexweşxaneya Bajar a Mêrsînê. Ji kesên hatin derbkirin Adnan Nazli rakirin beşa lênihêrîna awarte û ferdên din ên malbatê jî li ser pêyan hatin tedawîkirin. Piştî giliyê malbatê, êrişkar hatin binçavkirin û birin Midûriyeta Polîsan a Tarsusê.
