Şêniyên Kobanê bi boneya 11emîn salvegera rizgarkirina bajarê xwe ku ji çeteyên DAIŞê, hat rizgarkirin meşeke girseyî li dar xist. Di meşê de bênavber diruşmên berxwedanê hatin berzkirin.
Bi hezaran şêniyên bajarê Kobanê ji bo salvegera 11emîn a rizgarkirina Kobanê ji çeteyên DAIŞê, bi dirûşma “Bi rihê berxwedan û serkeftina Kobanê, em ê êrişên çeteyan têk bibin” meşekê li dar xist. Meş li Qada Jina Azad dest pê kir. Di meşê de wêneyên birîndaran û alên YPG û YPJê hatin hildan û dirûşmên “Berxwedan jiyan e”, “Bijî berxwedana YPG û YPJê” û “Na ji qetlîamên sivîlan re” berz kirin. Meş heta Qada Şehîd Egîd berdewam kir. Li wir cîgira Encûmena Cîbicîkar a Kantana Firatê Mizgîn Xelîl salvegera rizgarkirina Kobanê û damezirandina Rêveberiya Xweseriya Demokratîk pîroz kir.
‘Herkes deyndarê Kobanê ye’
Mizgîn Xelîl anî ziman ku gelê Kobanê li hember terora herî xeternak li ber xwe da û wiha got: “Em silavên xwe ji şervanên YPG, YPJ û QSDê û ji hemû gelê her çar parçeyên Kurdistanê yê dilê wan ji bo Kobanê lê dide, dişînin û em hemû şehîdên azadiyê bi bîr tînin. Em 11emîn salvegera Rêveberiya Xweser û rizgarkirina Kobanê li hemû gelê azadîxwaz pîroz dikin. Gelê Kobanê û şervanên YPG û YPJê bi hemû hêza xwe li hember çeteyên DAIŞê li ber xwe da û çete li Kobanê têk birin. Ji ber vê yekê her kesê li çar parçeyên Kurdistanê denydarê Kobanê ye.”
‘Şervanan got em hene û emê wan têk bibin’
Paşî fermandarê HSDê Cemîl Mazlûm axifî. Cemîl Mazlûm diyar kir ku di 2014an de rûmeta mirovahiyê hate parastin û wiha got: “Eynî vê rojê di 2014an de roja serkefina Kobanê me bi hev pîroz kir. Ji ber ku şervanên YPG û YPJê çeteyên herî hovane bi hemû hêza xwe têkoşîn kir û ew têk birin. Hemû dewletên ku xwe bi hêz bibînin, wê demê nikarîbûn çeteyên DAIŞê têk bibin. Lê şervanên azadiyê di 2014an de got em hene, şervanên ku li ser fikir û felsefeya Rêber Apo xwe bi rêxistin kir. Şervanan got em hene û em ê Ii hember çeteyan tê bikoşin û wan têk bibin. Bi rastî şervanên me bi hemû hêza xwe li ber xwe da û çeteyên hovane di Kobanê de têk birin.”
Cemîl Mazlûm anî ziman ku ew têkçûna çeteyên DAIŞê û avakirina Rêveberiya Xweseriya Demokratîk li Kobanê pîroz dikin û got: “Em bi berxwedana Kobanê bi serbilindî dijîn. Îro jî êrişî Kobanê dikin û dijminatiya Kobanê dikin. Lê em ê bi rihê 2014an li ber xwe bidin, çawa ku me di 2014an de çeteyên herî xeternak têk birin, em ê careke din dijmin têk bibin û wê her tim Kobanê bi ser bikeve.’
Meş bi dirûşmên “Berxwedan jiyan e” bi dawî bû.
