Bi sedan koçberên ji bajarê Serêkaniyê yên li kampa Serêkaniyê ya li bajarê Hesekê dimînin êrişên dagirkeran ên li ser herêmên Bakur û Rojhilatê Sûriyeyê bi daxuyaniyekê şermezar kirin.
Bi sedan koçberên ji bajarê Serêkaniyê li kampa Serêkaniyê ya bajarê Hesekê, ji bo şermezarkirina êrişên Tirkiyeyê û çeteyan ên li ser Bakur û Rojhilatê Sûriyeyê û koçberkirina xelkê ji warên wan, li pêşiya navedna meclisa kampê xwepêşandanek li dar xistin. Başdaran pankartên bi nivîsên “Şêniyên kampa Serêkaniyê dagirkeriya dewleta Tirk şermezar dikin û banga alîkariyê ji bo koçberên Efrînê dikin” û “Em êrîşên dewleta Tirk ên li ser gelê me yên Şehba û Til Rifetê şermezar dikin“ , hildan û durişmên şermezarkirina dagirkeriya Tirk berz kirin.
Çalakger li ber deriyê sereke yê kampê civîyan û deqeyek rêz girtin. Endamê Meclisa Malbatên Şehîdan a Serêkaniyê Ebdulrezaq Ehmed axivî û got: “Em hilweşandina rejîma Beşar Esed li hemû gelê Sûriyeyê pîroz dikin û em hêvîdar in ku hemû koçber vegerin cih û bajarên xwe.”
Di berdewamiya axaftina xwe de Ehmed tekez kir ku divê Sûriye bibe welatê hemû gelên Sûriyeyê.
Xwepêşandan bi dirûşmeyên “şehîd namirin” û bangên ji bo yekîtiyê, bi dawî bû.
