Wan – Serokwekîla Koma DEM Partiyê Gulistan Kiliç Koçyîgît li Wanê bang li gel kir û got: “Talanker û darbekar ji gel ditirsin. Lê meraq nekin, demokrasî dê bi tekoşîna gelê Wanê pêk bê.”
Polîsan serê sibê şeveqê bi ser avahiya Şaredariya Bajarê Mezin a Wanê de girt. Polîsan di serdegirtinê de ewil tabloya deynan a ji serdema Qeyûm ve maye daxist xwarê. Polîsan di serdegirtinê de 6 rojnameger jî di navde zêdeyî 100 kes binçav kirin. Di serdegirtina avahiya şaredariyê de kesên di hindir de hatin derpkirin û polîsan difina Parlementerê DEM Partiyê Colemêrgê Vezîr Parlak şikand. Li dijî serdegirtina polîsan parlamenterên DEM Partiyê û hevşaredar jî di navde li pêş avahiya şaredariyê kom bûn û li vir dest bi çalakiyan kirin. Girseya li pêş avahiya şaredariyê kom bûye bê navber dirûşma “Diz heye” berz kirin.
Hevşaredarên Bajarê Mezin ên Wanê Neslîhan Şedal û Abdullah Zeydan, Hevşaredarê Bajarê Mezin ên Amedê Serra Bûcak û Dogan Hatûn, parlementerên Partiya Wekhevî û Demokrasiyê ya Gelan (DEM Partî) û çend partiyî li Kolana Cûmhûriyetê dest bi meşê kirin. Miletê derdorê piştgirî da meşê û bi dirûşme û çepikan tayînkirina qeyûm protesto kirin. Polîsan girse dorpêç kir û hevşaredar û parlementer derp kirin. Li vir Hevşaredarê Amedê Dogan Hatûn, Ecevît Ceylanci, Abdûrrahman Bedîr, Garîp Yazici, Allahverdî Çelîkok, Necmettîn Erterok, Vahap Coşkûn, Şahîn Yagizer, Şehrîban Dûrmîş Kaçak, Atiye Şen, Macîde Varhan, Mehmet Manto, Hakan Şenkal, Mûrat Îtah, Vezîr Karakbûkût, Berfîn Kûşman, Mûsa Dûman Mehmet Alî Sonmez, Mehmet Bîlîcî, Hamza Çolgeçen, Veysel Şen, Gonul Ûzûnay, Zeynep Tagtekîn, Şengul Polat, Çîgdem Karabûlak, Sînem Mamal, Umît Tayaner, Kemal Koken, Yûsûf Tarhan, Diyar Temel, Mûsa Sertkal, Medya Mermît, Hacî Alaca, Ercan Koç, Emîn Kûtas, Firat Yobaş, Ridvan Ozyûrt, Sûzan Babur û gelek welatiyên ku navê wan nehat zanîn hatin binçavkirin.
Serokwekîla Koma DEM Partiyê Gulistan Kiliç Koçyîgît ku gihişt bajêr, xwest biçe nava koma hevşaredaran ku di dorpêçê de bûn. Polîsan nehişt Gulistan Kiliç Koçyîgît bikeve nava komê û li ser vê yekê Gulistan Kiliç Koçyîgît dest bi meşê kir. Gelek welatiyên derdorê piştgirî dan Gulistan Kiliç Koçyîgît, lê polîsan vê carê jî Gulistan Kiliç Koçyîgît dorpêç kirin û welatiyên wir bi bombe û gûleyên gazê hatin belavkirin. Welatiyan dorpêçkirina Gulistan Kiliç Koçyîgît şermezar kir û bertek nîşanî polîsan da. Herî dawî polîsan di nav dorpêçê de Gulistan Kiliç Koçyîgît birin nav koma hevşaredaran û di bin dorpêça polîsan de girse heta avahiya DEM Partiyê meşiyan.
Gulistan Kiliç Koçyîgît di vê meşê de axivî, diyar kir ku ew rastiya polîsan a ji silaveke gel ditirse dibînin û wiha got: “Em rastiya dewletê ya ji vîna gel ditirse dibînin. Talanker û darbekar ji gel ditirsin û polîsên xwe peywirdar dikin. Bi hezaran polîs anîne û her der girtine. Em dewleta ku ji Wanê ditirse dibînin. Lê, meraq nekin, wê demokrasî bi tekoşîna gelê Wanê bê. Em ji gelê xwe yê Wanê serbilind in.”
Girse derbasî avahiya DEM Partiyê bû û wê sibê bi tevlibûna Hevserokên Giştî yên DEM Partiyê Tulah Hatîmogûllari û Tûncer Bakirhan li Wanê daxuyanî bê dayîn.
Çalakiyên gel ên li dijî tayînkirina qeyûm cih cih berdewam dike.
