Komuna Fîlm a Rojava bi daxuyaniyekê bang li hemû sînemageran kir ku piştevaniyê bidin Şoreşa Rojava û got: “Di mihrîcan, komxebat û platformên xwe de cih bidin têkoşîna Şoreşa Rojava.”
Komîna Fîlm a Rojava bi daxuyaniyekê bang li sînemageran kir ku piştgiriyê bidin Şoreşa Rojava. Komînê xwest sînemager di mîhrîcan, komxebat û platformên xwe de cih bidin Şoreşa Rojava û têkildarî mijarê li ser hesabên xwe parvekirinan bikin.
‘Tovên jiyana nû bi israra avdanê şîn bûn’
Komînê bal kişand ser zehmetiyên têkoşîna Şoreşa Rojava ya li hember DAIŞê hatiye dayîn û wiha got: “Rojava bi bîr xist ku ev hovên ku dixwestin vê barbariya serdema navîn li ser hemû mirovahiyê bixin jî, dikarin werin têkbirin, û divê qencî ji xerabiyê netirse. Bi Rojava re, li Rojhilata Navîn, tovên rizgariya jinan, jiyana hevbeş a mirovan, jiyana ekolojîk û demokrasiya rasterast, her çend bi xwînê hatibin avdan jî, bi israrî dest bi şînbûnê kirine.”
‘Şer jiyan çand û hêviyê jî hedef digire’
Komînê diyar kir ku hêzên navneteweyî, Tirkiye, DAIŞ û HTŞ naxwazin ku li Rojava pergaleke demokratîk ava bibe û wiha got: “Ne tenê qirkirina fîzîkî, di heman demê de qirkirina jiyan, çand û hêviyê jî hedef digirin. Parastina van nirxan û Rojava berpirsiyarî û erkê hemû mirovên xwedî wijdan e. Divê cîhan nîşan bide ku ew ev berdêla mezin a Kurd û şoreşgerên li Rojava ji bo parastina nirxên mirovahiyê û rizgarkirina cîhanê xwedî kedeke mezin in.
‘Em rastiyan nebêjin dê derew bibin dîrok’
Em wek Komuna Fîlm a Rojava, dizanin ku heta ku em rastiyên xwe nebêjin, derewên yên din dê bibin dîrok. Lê em ne bi tenê ne. Ev têkoşîn têkoşîna hevpar a hemû mirovahiyê ye. Û sînema zimanê herî gerdûnî yê vê têkoşînê ye.”
Banga piştgiriyê
Komînê di berdewama daxuyaniya xwe de beng li hemû çêkerên fîlm yên welatparêz, şoreşger û demokrat, hilberînerên fîlmên serbixwe, senarîst, derhênerên fîlman, edîtor û hunermendan kir ku Şoreşa Rojavayê bi piştgiriyê mezin bikin û daxwazên xwe wiha bi rêz kirin:
“* Werin, em hevgirtina xwe xurt bikin.
* Zilma DAIŞ, HTŞ û dewleta Tirk û têkoşîna bi rûmet a li dijî wê, têxin rojeva raya giştî ya cîhanê.
* Di mîhrîcan, platform û komxebatên xwe de cih bidin têkoşîna Rojava.
* Zanebûna xwe ya teknîkî, ezmûn û hêza xwe ya afirîner ji bo parvekirina kolekîf bikin beşek.
* Peyamên xwe yên bidîmen ên piştgiriyê li ser platformên dîjîtal parve bikin.
‘Em şervanên dîmenên heqîqetê ne’
Komîn herî dawiyê ev tişt gotin: “Em şervanên dixwazin bi hêza dîmenan haqîqetê bînin ziman in. Çekê rastiyê, ji ya derewan tûjtir e, û em vê taritiyê dê bi ronahiya ku bi hev re diavirînin ji holê rakin. Hevgirtina me ronîkere herî bi hêz e ku dê perdeya berxwedana me ronî bike. Bijî berxwedana Rojava!, Jin, jiyan, azadî!, Bijî sînemaya azad!”
