Platforma Saziyên Demokratîk li gelek bajarên bakurê Kurdistanê û Tirkiyeyê bi çalakiyên cuda Komploya Navneteweyî ya 15ê Sibatê şermezar kirin û azadiya fîzîkî ya Rêberê Gelê Kurd Abdullah Ocalan xwestin. Di çalakiyan de êrişên li dijî Rojavayê Kurdistanê jî hatin şermezarkirin û peyama banga mezinkirina têkoşînê hate kirin.
Bi boneya 27emîn salvegera Komploya Navneteweyî ya 15ê Sibatê ya li dijî Rêberê Gelê Kurd Abdullah Ocalan, li gelek bajaran meşên girseyî hatin lidarxistin. Li bajarên wekî Amed, Wan, Stenbol, Êlih, Mêrdîn, Edene, Mêrsîn, Îzmîr, Riha, Dêrsim û dehan bajar û navçeyên bakurê Kurdistan û Tirkiyê daxuyanî hatin dayîn û meş hatin lidarxistin. Di meşên ku bi deh hezaran kes têlêbûn de azadiya Rêberê Gelê Kurd Abdullah Ocalan hate xwestin.
STENBOL
Platforma Saziyên Demokratîk a Stenbolê li Qada Aksarayê ya Stenbolê li dijî komploya navnetewî daxuyanî dan. Parlamenterên DEM Partiyê, Hevserokên DEM Partiyê yên Stenbol û navçeyan, Dayikên Aştiyê, HDK, TJA, nûner û rêveberên saziyên civakî û gelek welatî tev li çalakiyê bûn. Li qadê dirûşmeyên “Bijî Serok Apo”, “Bijî Berxwedana Rojava” Bê Serok Jiyan Nabe” hatin berzkirin û pankarta “Bi roniya heqîqetê ber bi azadiyê ve” û “15ê Sibatê dişkinî, bi rêberê azadiyê re 27ê Sibatê înşa dikin” hat vekirin. Hevseroka Stenbolê Arîfe Çinar di daxuyaniyê de axivî û got: “Bi têkoşînê komplo vale derket. Îro pêvajo heye lê hê jî tecrîd berdewam dike. Em dizanin ku pêvajo bi azadiya Rêberê Gelê Kurd Abdullah Ocalan ve girêdayî ye.”
Piştî daxuyaniyê polîs êrişî girseya kombûyî kir û 8 kes binçav kirin.
‘Tevî dorpêçê paradîgma belav dibe’
Rêvebera DEM Partiyê ya Stenbolê Gîzem Kuzuk anî ziman ku Rêberê Gelê Kurd Abdullah Ocalan derbarê komployê de pênaseya “Di şexsê min de hat xwestin li Rojhilata Navîn pêşiya çareseriya gelê Kurd bigirin û gelê Kurd bêstatû bihêlin” û wiha got: “Gelê Kurd û dostên wan ji bo komployê vale derxin bi bedelên giran dan. Îro li Kurdistan, Tirkiye û Rojhilata Navîn qeyranên girîng diqewimin, sedema wan jî tecrîda Îmraliyê ye. Lê li gel dorpeçkirinê jî fikrên bîrêz Abdullah Ocalan li her aliyê Rojhilata Navîn belav dibe. Bi taybet jî sîstema Rojava dibe hêvî.” Daxuyanî bi berzkirina dirûşmeya “Bijî Serok Apo” bi dawî bû.
ENQERE
Platforma Saziyên Demokratîk ên Enqereyê, di salvegera komploya navneteweyî ya li dijî Rêberê Gelê Kurd Abdullah Ocalan li cahdeya Sakarya ya navçeya Çankaya ya Enqereyê daxuyanî dan. Parlamenter û cigirê hevserokên giştî yê Partiya Wekhevî û Demokrasiyê ya Gelan (DEM Partî) Mehmet Ruştu Tîryakî, endam û nûnerên partiyên siyasî û saziyên civakî yên giredayî platformê jî di daxuyaniyê de amade bûn. Beriya daxuyaniyê pankarta li ser, “Em komploya navdewletî şermezar dikin” dinivisî û wêneyê Rêberê Gelê Kurd Abdullah Ocalan hebû polîsan desteser kirin. Hevserokê DEM Partiyê Fatîn Kanat daxuyanî xwend û wiha got: “Rojava mînaka wekhevî û azadiya gelan e. Ji bo pêşveçûna pêvajoyê Aştî û Civaka Demokratîk divê mafê heviyê ji bo birêz Abdullah Ocalan û girtiyên siyasî pêk were.”
‘Divê li welat asayîbûn çêbe’
Parlamenterê DEM Partiyê Mehmet Rustu Tîryakî jî bi lêv kir ku heke komplo bigiheşta encamê dê di navbera gelan de şerek mezin derketa û ev tişt gotin: “Birêz Ocalan ew şer da sekinandin. Ew roj her sal tê şermezarkirin. Berdewamiya komplo li Rojava careke din xwestin pêk bînin. Gelê Kurd û birêz Ocalan ew şer jî da sekinandin. Li Tirkiye em qala pêvajoyeke dikin. Heke desthilat rastî jî bixwesta vê pêvajoyê normalîze bike dest nedida ser pankarta me. Heta desthilat birêz Ocalan weke aktorekî siyasî qebûl neke em her werin dorpêçkirin dê mudaxile li wêneyê birêz Ocalan bikin. Çi gav werin avetin jî em nikarin tu pirsgirêkan çareser bikin. Divê asayîbûn pêk were. Divê êdî komplo pêk neyên û aştiyeke mayindê pêk were. Ji bo vê jî divê têkoşîna me dê bidome.” Daxuyanî bi berzkirina dirûşmeyên, “Jin Jiyan Azadî azad bike Rêbertî” bi dawî bû.
EDENE
Li Edeneyê gelek kes beşdarî çalakiya şermezarkirinê ya li ber Rêxistina Bajar a Edeneyê ya DEM Partiyê pêk hatî, bûn. Hevserokê Rêxistina Navçeya Ceyhanê ya DEM Partiyê Tahîr Ozdemîr daxuyanî da û anî ziman ku li hemberî polîtîkayên êriş û tecrîda li ser Rêberê Gelê Kurd Abdullah Ocalandê li dora “Pêvajoya Aştî û Civaka Demokratîk” têkoşîna xwe dewam bikin. Ozdemîr diyar kir ku pêvajoya di 9ê Cotmeha 1998an de destpê kir di 15ê Sibata 1999an de bi dîlgirtina Ocalan ya li Îmraliyê dewam kir û anî ziman ku ligel mercên tecrîda giran jî çareseriya demokratîk û perspektîfa aştiyê ya bi rûmet komplo têk biriye. Ozdemîr her wiha destnîşan kir ku wê di çareseriya aştiyane û demokratîk a pirsgirêka Kurd de israr bikin. Ozdemîr ragihand ku wê rê nedin hewldanên komployên nû yên li ser Rojava û tevahiya herêmê û got, bi berxwedana hevpar a gelan êriş bi giranî hatin têkbirin. Daxuyanî bi qêrîna diruşmeyan bi dawî bû.
MÛGLA
Platforma Saziyên Demokratîk li Mûglayê li dijî komploya navneteweyî li pêşiya avahiyê DEM Partiyê yê navçeyê daxuyanî da. Daxuyaniyê Hevseroka DEM Partiyê ya Muglayê Zuhal Macît xwend. Zuhal Macîd da zanîn ku Rêberê Gelê Kurd Abdullah Ocalan ji 15ê Sibat a 1999an ve li Girtîgeha Îmraliyê di bin şert û mercên giran ê tecrîdê de tê girtin lê bi têkoşîna xwe ya ji bo aştiyeke birûmet û demokratîkbûnê, ev komplo pûç kir û ev tişt gotin. “Îro ya ku rastî êrişan tê, paradîgmaya Birêz Ocalan e. Hêzên li dijî Pêvajoya Aştî Civaka Demokratîk, bi operasyonên têgehan, bi weşanên dezenformasyonê yên saziyên medyaya şerê taybet û bi artêşa trolên medyaya dîjîtal, konsepta êrişeke piralî dane destpêkirin. Em ê bi israra xwe ya ji bo çareseriya demokratîk a pirsgrêka Kurd û aşitiyeke birûmet, van êrişan careke din pûç bikin.” Daxuyanî bi berzkirina diruşman bi dawî bû.
AMED
Di pêşengtiya Platforma Saziyên Demokratîk de bi boneya salvegera komploya 15ê Sibatê ya Navneteweyî ya li dijî Rêberê Gelê Kurd Abdullah Ocalan hate pêkanîn bi dirûşma “Bi ronahiya heqîqetê ber bi azadiyê ve” li Amedê meşek hate lidarxistin. Hevserokê Partiya Herêmên Demokratîk (DBP) Keskîn Bayindir, endam û rêveberên partiyên siyasî, saziyên sivîl ên civakî û bi sedan kes beşdarî meşê bûn. Girseya ku li ber Bîrdariya Mafên Mirovan a Koşûyolûyê kom bû, alên ku wêneyê Rêberê Gelê Kurd Abdullah Ocalan li ser hilgirtin. Di meşê de pankartên “Kes nikare tu carî roja me tarî bike” û “Bi ronahiya heqîqetê ber bi azadiyê ve” hatin hilgirtin û ronahiyên telefonan hatin vekirin. Girseyê di meşê de her tim dirûşmên “Bijî Serok Apo” , “Bê Serok jiyan nabe” , “Silav silav ji Îmraliyê re hezar silav” , “Bijî berxwedana Rojava” û “Jin jiyan azadî” berz kir.
Girse bi tilîlî û çepikan gihişt ber Plazaya AZC ya li Semta Ofîsê ya navçeya Yenîşehîrê û li vir axaftin hatin kirin. Destpêkê Hevseroka Komeleya Piştevanî û Alîkariyê ya bi Malbatên Girtî û Hikumxwaran re (TUAY-DER) a Amedê Yeter Erel Tûma axivî. Yeter Erel Tûma diyar kir ku 15ê Sibatê tenê ne salnameyeke roja ku hewl hate dayîn gelê Kurd bê “Serok” bimîne û ji holê bê rakirine û wiha got: “Ji bo ku tarîtiyê ronî bikin em îro li vir in.”
‘Rêber Ocalan planên wan pûç kirin’
Dû re Hevserokê Giştî yê DBPê Keskîn Bayindir axivî. Keskîn Bayindir da zanîn ku Şandeya Îmraliyê dê sibê biçe Girava Îmraliyê û wiha got: “Îro roja reş kir roja ronahî. Em ji vir silavên germ ji Rêzdar Ocalan re dişînin. Êdî dev ji vê zîhniyeta komploger berdin. Rêzdar Ocalan tiştek nîşanî gelê Kurd û cîhanê da û got ‘Hûn çiqas tecrîdê pêk bînin, gelê Kurd û Kurdistanê îzole bikin jî fikrên min li kolanên Amedê, li axa Kurdistanê û cîhanê ne.’ Îro fikr û ramanên Rêber Ocalan bûye nîşangeha gelê Kurd û Kurdistanê. Bi deh hezaran gelê Kurd li kolanan dimeşin. Heta rejîma Îmraliyê û dorpêça li îmraliyê neyê rakirin hûn pêşiya çareseriyê, li hevkirinê û çareseriya demokratîk a gelê Kurd digirin. Meheke em li kolanan e planên navnetewî li ser destkeftiyên gelê Kurd bûn. Gotin ‘em ê destkeftiyên Rojava ji holê rakin û gelê Kurdistanê qetil bikin.’ Plana wan ev bû. Lê Rêber Ocalan ev komplo li erdê xist û planên wan pûç kirin.”
‘Rêberê Ocalan ji bo gelên mazlûm hêvî ye’
Keskîn Bayindir di berdewama axaftina xwe de ev tişt gotin: “Em ji vir peyamekê didin. Rêber Ocalan ji bo we jî ji bo gelê Kurdistan û gelên mazlûm hêvî ye. Em li ber xwe didin têdikoşin doza hebûn û statuya xwe didin. Navenda azadî û aştiyê Girava Îmraliyê Rêzdar Ocalan. Dayik, jin û ciwan li vir hene armanc yek e heta azadiyê, serkeftinê û aştiyê em ê têbikoşin. Em ji vir dewlet û desthilatê re tiştekê dibêjin heke hûn berê xwe bidin cihekî din gelê Kurd vê dibîne, heke niyeta we ya çareserkirina pirsgirêka Kurd hebe berê xwe bidin Rêzdar Ocalan ku bi milyonan kes li pişt wî ne.”
ÊLIH
Li Êlihê jî girseya ku li ser Cadeya Gulistanê kom bû, bi pankarta “Bi ronahiya heqîqetê ber bi azadiyê ve” ber bi avahiya DEM Partiyê ya Êlihê ve dimeşe.
RIHA
Bi pêşengiya Platforma Saziyên Demokratîk a Rihayê meşek hate li darxistin. Koma qelebalix pankarta bi nivîsa, “Em Komploya Navneteweyî ya 15ê Sibatê şermezar dikin! Bi ronahiya heqîqetê ber bi azadiyê ve” vekir, ronahiya telefonên xwe yên destan pêdixistin. Girseya li Qada Topçuyê ya Navçeya Haliliyê kom bû, bi berzkirina sloganên, “Bijî Serok Apo” û “Bi can û xwîn em bi te re ne ey Serok” heta Kargeha Ahmet Bahçivan meşiya. Li vir Hevseroka Rêxistina Bajar a Rihayê ya DEM Partiyê Ayşe Surucu axivî û balkişand ser komployê. Surucu wiha goti: “15ê Sibata 1999an ji aliyê gelê Kurd ve wekî ‘Roja Reş’ tê zanîn.Komploya vê rojê pêk hatî hêj bi rêbazên cuda tê meşandin û bandora xwe li ser siyaseta Tirkiye û cîhanê dike.” Surucu komplo bi tundî şermezar kir ev tişt gotin: “Komplo li hemberî biryardariya bêdawî ya Rêberê Gelê Kurd Abdullah Ocalan a ji bo çareseriyê têkçûneke dîrokî jiyaye. Di vê serdema krîtîk de, her ku şewqa şer a herêmî belav dibe û Tirkiye û Kurdistanê dixe ber xwe, îdeolojî û hêza biryardayînê ya Birêz Ocalan derfeta herî mezin e.”
Parlamenterê Rihayê yê DEM Partiyê Ferit Şenyaşar di axaftina xwe de komplo şermezar kir û wiha domand: “Kesên ku komploya 15ê Sibatê organîze kirin, negihîştin armancên xwe. Wan dixwest têkoşîna gelê Kurd a ji bo azadî û rûmetê tune bikin. Lêbelê, têkoşîna gelê Kurd a ji bo azadiyê li seranserê cîhanê her ku diçe mezin dibe. Li Rojava hewldanek ji bo komployeke nû ya 15ê Sibatê hat kirin. Ev komployê jî bi destwerdana Rêberê Gelê Kurd Abdullah Ocalan hat pûçkirin. Gelê Kurd niha dixwaze di vê pêvajoyê de gavên berbiçav bibîne. Sermizakeregerê vê pêvajoyê Birêz Ocalan e û hîn jî li Îmraliyê ye. Em êdî vê yekê qebûl nakin. Divê ‘mafê hêviyê’ demildest were pêkanîn û mafê xebata azad bê pêkanîn. Daxuyanî bi dirûşmeyan bi dawî bû.
CIZÎR
Platforma Ked û Demokrasiyê ya Şirnexê jî bi heman armancê çalakî pêk anî. Nûnerên partiyên siyasî, saziyên sivîl û gelek welatî li ber Rêxistina Navçeya Cizîrê ya DEM Partiyê kom bûn. Girseya pankarta, “Bi ronahiya heqîqetê ber bi azadiyê ve” vekir, dowîzên, “Bijî Serok Apo” û “Bê Serok jiyan nabe” vekirin. Girseya heta Çerxereya Dortyolê meşiya sloganên, “Bê Serok jiyan nabe” û “Silav silav ji Îmraliyê re hezar silav” berzkirin. Welatiyan ronahiyên telefonên xwe pêxistin û tarîtiya şevê ronî kirin. Piştî meşê daxuyaniyek hate dayîn. Daxuyanî bi merasîma rêzgirtinê dest pê kir. Hevserokê DBP’ê yê Cizîrê Bager Aşkin di axaftina xwe de diyar kir ku heta Rêberê Gelê Kurd Abdullah Ocalan azad nebe, kes azad nabe. Piştî wî, Hevserokê DEM Partiyê yê Cizîrê Yilmaz Sanri metna hevpar xwend û destnîşan kir ku komplo têk çûye û Abdullah Ocalan bi ser ketiye. Parlamentera Şirnexê ya DEM Partiyê Newroz Uysal Aslan jî komploya navneteweyî şermezar kir û ev tişt got: “Gelê Kurd her sal li dijî komployê li qadan e. Yahya Menekşe berî 15 salan dema komplo şermezar dikir hat qetilkirin. Em wî bi rêzdarî bi bîr tînin. Me ev komplo nas nekiriye û em ê nas nekin. Ne komploya 15’ê Sibatê û ne jî komployên li ser Rojava, em tu carî qebûl nakin. Gelê Cizîrê dê her tim xwedî li îradeya xwe derkeve. Heta ev roja reş bibe ronahî, em ê têkoşînê berdewam bikin. Kurdan li Rojava bersiva komployê da. Îro dixwazin komployê nû bikin, lê gelê Kurd dê li dijî vê heta dawiyê li ber xwe bide.”
Daxuyanî bi dirûşmên “Bijî Serok Apo” bi dawî bû. Piştî daxuyaniyê girse bi dirûşmên “Bijî berxwedana Rojava” û “Bi can bi xwîn em bi te re ne ey Serok” heta ber avahiya partiyê meşiya.
WAN
Platfomra Saziyên Demokratîk a Wanê bi boneya salvegera 27emîn salvegera Komploya Navdewletî ya 15ê Sibatê ku li hember Rêberê Gelê Kurd Abdullah Ocalan hatibû pêkanîn, li Rêya Armûşê meşek lidar xist û daxuyaniyek da. Girse li ber Gunpaş AVMê kom bû û heta Nexweşxaneya Taybet ya Lokman Hekîm bi pankarta “Bi ronahiya heqîqetê ber bi azadiyê ve” meşiya. Di meşê de girseyê dirûşmên “Bijî Serok Apo”, “Bê Serok jiyan nabe” û “Hezar silav ji Îmarliyê re” berz kirin. Parlementer, hevşaredar, endam û rêveberên partiyên siyasî, nûnerên saziyên sivîl û bi sedan welatî tev li meşê bûn.
‘Sekna Ocalan komplo têk bir’
Piştî meşê li ber nexweşxaneyê daxuyanî hat dayîn. Hevserokê TÛHAY-DERê Osman Başak metna daxuyaniyê xwend û diyar kir ku bibiryariya Abdullah Ocalan ya ji bo çareseriyê, ev komploya tarî ya li hember azadiya gel, têk bir. Osman Başak anî ziman ku gelê Kurd û hevalbendên wî ji bo pûçkirina vê komployê bedelên giran dane û got: “Bi çalakiyên wekî ‘Hûn Nikarin Roja Me Tarî Bikin’ bi mîlyonan kesan ji bo parastina Rêber Abdullah Ocalan çembera agir çêkirine û li meydan û zindanan li ber xwe dane û nehiştine ku komplo bi ser bikeve.Siyaseta îmha û înkarê ya ku komploya 15ê Sibatê hedef girt, îro bi îradeya aştiyê ya Birêz Ocalan tê têkbirin. Parastina vê îradeya dîrokî, rawestana li dijî hişmendiya komploger û avakirina pêşerojek azad berpirsiyariya me ya hevpar û erkê me ya neçar e. Dirûşma me ew e ku em bi ronahiya rastiyê ber bi azadiyê ve bimeşin. Navnîşana çareseriyê û îrade zelal e; paşguhkirina vê îradeyê tarîkirina pêşerojê ye. Ji ber vê yekê, divê azadiya Birêz Ocalan tavilê were misogerkirin.”
Pişte parlementerê DEM Partiyê yê Wanê Zulkuf Ûçar axivî û bertek nîşanî Midûriyeta Polîsan a Wanê da ku ji bo girse nemeşe astengî derxistin. Zulkuf Ûçar anî ziman ku ew mafên xwe yên herî bingehîn bi kar tînin û xwest tavilê ev pêkanîn bên rawestandin. Piştî çalakî bi dawî bû polîsan çêr li welatiyê bi navê Hamdûllah Kûmlî kirin yê ku bertek nîşanî polîsan da, bi lêdanê hat binçavkirin. Piştî kar û barên îfadeyê Kûmlî hat berdan.
COLEMERG (Navend-Gever-Şemzînan)
Di pêşengtiya Platforma Saziyên Demokratîk de li Colemêrgê û navçeyên wê Şemzînan û Geverê li dijî komploya navneteweyî meş pêk hatin. Li Geverê meşê li ber deriyê DEM Partiyê destpêkir heya sukê dewam kir. Polêsan nehişt gel bi meşaleyan bimeşe û gel bi îşiqên telefonên xwe meşiya. Gelê di seranserî meşê de dirûşmên “Bê serok jiyan nabe”, “Bijî serok Apo” berz kirin. Piştî meşê daxuyaniya çapemeniyê hat dayîn. Daxuyanî ji alilyê Hevserokê DEM Partiyê yê Gever Abdullah Kirmizitaş ve hat xwendin.
Abdûllah Kirmizitaş da zanîn ku baweriya xwe bi siyaseta demokratîk, maf û çareseriya aştiyane tînin û got: “Em bawer dikin ku aştiya civakî tenê bi adaletê, rûbirûbûnê û diyalogê tê xurtkirin. Îro em careke din tekez dikin ku rêya aştiya mayînde, ahenga civakî û pêşerojeke demokratîk ne bi polîtîkayên înkar û tepeserkirinê, lê bi serweriya hiqûqê, diyalog û siyaseta demokratîk derbas dibe. Kirmizitaş xwest ku mafê hêviyê ji bo Rêberê Gelê Kurd Abdûllah Ocalan demildest pêk were û got: “Mafê hêviyê daxwazeke takekesî nîn e, pêwistiyeke li gor normên gerdûnî yên hiqûqî ye.”
Di heman çerçovê de li navenda Colêmêrgê û navçeya Şemzînanê jî gel derket kolanan û li dijî Komploya navdewletî ya 15ê Sibatê nerazîbûnen xwe anî ziman û komplo şermezar kir.
MÛŞ (Navend-Milazgîr-Kop)
Platforma Saziyên Demokratîk a Mûşê ji bo protestokirina Komploya Navdewletî ya 15ê Sibatê meşek meşaleyî li dar xist û daxuyaniyek da. Girse li ber navenda tenduristiyê ya taxa Yeşîlyurtê kom bû û heta xaçerêya Fîdanlikê meşiya. Di meşê de girseyê dirûşmeyên “Hezar silav ji Îmraliyê re” û “Bê Serok jiyan nabe” berz kirin.
Li navçeyên Milazgir û Kopê yên Mûşê jî di pêşengtiya Platforma Saziyên Demokratîk de bi tevlêbûna Hevşaredar û endamên meclisê yên her du navçeyan û welatiyan meş hatin li darxistin û daxuyanî hat dayîn. DAxuyanî ji aliyê hevserokê DEM Partiyê yê navçeya Kopê Abdûlbarî Yigit ve hat xwendin.
Abdûlbarî Yigit bilêvkir ku ew komploya navneteweyî şermezar dikin û got: “Vê komployê vîna gelê Kurd, têkoşîna gelê Kurd û hêviya wî ya aştiyê hedef girt. Em weke hêzên demokrasîxwez dibêjin bila tecrîda li ser Rêberê Gelê Kurd Abdûllah Ocalan bi dawî bibe, rêya aştiyê bê vekirin.”
ERZIROM
Platforma Saziyên Demokratîk a Erzirûmê, Komploya Navneteweyî ya 15ê Sibatê bi nîşandana sînevîzyon, meş û daxuyaniyekê şermezar kir. Bernameya li avahiya Rêxistina Bajar a Erziromê ya DEM Partiyê hate lidarxistin, bi deqeyek rêzgirtinê dest pê kir. Piştî nîşandana sînevîzyona derbarê Komploya 15ê Sibatê de, girse bi pankartên bi Kurdî û Tirkî yên bi nivîsa, “Bi ronahiya heqîqetê ber bi azadiyê ve” ber bi Qada Mahallebaşı ve dest bi meşê kir. Di meşê de bênavber diruşmeya, “Bijî Serok Apo” hate berzkirin. Hevserokê Rêxistina Bajar a Erziromê ya DEM Partiyê Barış Kemaloglu, axivî û Komploya 15ê Sibatê şermezar kir. Keremoglu wiha got: “Divê sîstema tecrîdê demildest bi dawî bibe, divê azadiya Birêz Ocalan demildest were misogerkirin û divê garantiyên yasayî ji bo pêvajoya danûstandinên demokratîk bên amadekirin.” Keremoglu balkişand ser êrişên li ser Rojavayê Kurdistanê û bang li gelê Kurd kir ku heta azadiya Ocalan û statûya Rojavayê Kurdistanê berxwedanê bênavber mezin bikin.
BEDLÎS
Platforma Saziyên Demokratîk a Bedlîsê ji bo şermezarkirina Komploya navdewletî ji Dibistana Seretayî ya Kazim Paşa heta meydana bajêr a Mizgefta Mezin meşek meşaleyî li dar xist. Gelek welatî beşdarî meşê bûn û dirûşmeya “Bê Serok Jiyan nabe” berz kirin. Piştî meşê hevseroka DEM Partiyê ya Bedlîsê Şevder Bîngul diyar kir ku 15ê Sibatê di dîroka Kurdan de rojek tarî ye.
AGIRÎ
Platforma Saziyên Demokratîk a Agiriyê jî bi boneya 27emîn salvegera Komploya Navdewletî ya 15ê Sibatê meş hat lidarxistin. Girse ji Pirûtxaneya Gel heta Cadeya Cûmhûriyetê bi pankarta “Em komploya 15ê Sibatê şermezar dikin” meşiya û dirûşmên “Bijî Serok Apo” û “Bê Serok jiyan nabe” berz kirin.
Parlementera DEM Partiyê ya Agiriyê Nejla Demîr piştî meşê axivî û diyar kir ku 15ê Sibatê ji bo gelê Kurd xaleke dîrokî ye û got: “Vîna gel bû hedefa komployeke navneteweyî. Tevî salên derbasbûyî jî, gelê Kurd dev ji daxwaza xwe ya çareseriyeke demokratîk bernedaye. Divê polîtîkayên tecrîdê bi dawî bibin û kanalên siyasî yên demokratîk ji bo jiyana wekhev û azad a gelan werin xurtkirin.”
Çalakî bi dirûşman bi dawî bû.
DÊRSIM
Platforma Saziyên Demokratîk a Dêrsimê li Kolana Hunerê derbarê Komploya Navneteweyî ya 15ê Sibatê de daxuyaniyek da. Di xwepêşandana pankarteka bi nivîsa, “Êve roşta raştîye verva ozadîye” hatibû vekirin de, Hevserokê Bajar a Dêrsimê ya DEM Partiyê Ozcan Ateş axivî û komplo şermezar kir. Piştre, Parlamentera bajêr Ayten Kordu axivî û balkişand ser Komploya 15ê Sibatê. Kordu got ku armanca Komployê tunekirina hebûna gelê Kurd bûye. Kordu diyar kir ku ev ne komployeke di kesayeta Birêz Ocalan de li ser Kurdan hatiye sepandin bûye û wiha got: “Armana vê Komploye tunekirina gelê Kurd bû.
Xwestin heman Komployê li dijî Rojavayê Kurdistanê jî pêk bînin. Îro êrişên li dijî Rojava di heman demê de êrişên li ser paradîgmaya modernîteya demokratîk a azadîxwaza jinê, demokratîk û ekolojîk a Birêz Ocalan e. Ev êriş bi polîtîkayên tecrîdê berdewam dikin.” Ayten Kordu ku banga pêkanîna “mafê hêviyê” ji bo misogerkirina şert û mercên kar ên azad û azadiya fîzîkî ya Rêberê Gelê Kurd Abdullah Ocalan kir û ev tişt gotin: “Em vê zîhniyeta komployê ya ku 27 sal berê hatiye pêşxistin şermezar dikin. Em israr dikin ku divê azadiya fîzîkî ya Birêz Öcalan bê misogerkirin.”
XARPÊT
Platforma Saziyên Demokratîk a Xarpêtê jî bi heman armancê li Garaja Hozatê daxuyaniyek da çapemeniyê. Li ser navê koma pankarta, “Em Komploya 15ê Sibatê bi ronahiya rastî û azadiyê şermezar dikin” vekirî, Hevseroka Navçeya Navendî ya DEM Partiyê Saadet Yavuz daxuyanî xwend. Di axaftina xwe de Yavuz Komploya 15ê Sibatê şermezar kir û xwest demildest azadiya fîzîkî ya Rêberê Gelê Kurd Abdullah Ocalan pêk bê. Yavuz anî ziman ku heta azadiya Ocalan û çareseriya pirsgirêka Kurd dê têkoşîna xwe bidomînin.
ÇEWLIG
Platforma Saziyên Demokratîk a Çewligê jî Komploya 15ê Sibatê li Qada Bajar bi daxuyaniyekê şermezar kir. Li ser navê koma pankarta “Em Komploya 15ê Sibatê bi ronahiya heqîqê û meşa ber bi azadiyê ve şermezar dikin” vekir daxuyanî hate xwendin. Hevserokê Rêxistina Bajar a Çewlikê ya DBPê Şevket Kalindamar banga mezinkirina têkoşîna li dijî komployê kir. Hevserokê Rêxistina Bajar a Çewlikê ya DEM Partiyê Sedat Ormangoren jî axatinek kir û komploya li dijî Rêberê Gelê Kurd Abdullah Ocalan şermezar kir. Ormangoren wiha got: “Di şexsê Abdullah Ocalan de hate xwestin ku daxwazên wekhevî, aştî û azadiyê yên gelê Kurd bên tunekirin. 15ê Sibatê komployek ji rezê nîne. Îro roja teşhîr kirina vê roja tarî û derxistina holê ya heqîqetê ye. Her wiha roja mezinkirina daxwazên gelan ên azadî û aştiyê ye.”
ESKÎŞEHÎR
Rêxistina Bajar a Eskîşehîrê ya DEM Partiyê li avahiya civîna çapemeniyê li dar xist. Hevserokê Rêxistina Bajar a Eskîşehîrê ya DEM Partiyê Bektaş Turkmen diyar kir ku sîstema tecrîdê ya Îmraliyê beşek ji komployê ye û wiha got: “Divê sîstema tecrîdê bi dawî bibe û ji Birêz Abdullah Ocalan re şertên xebata azad û ragihandina azad werin peydakirin. Azadiya fîzîkî ya Birêz Ocalan ne tenê pêdiviyeke pêvajoyê ye, lê di heman demê de hêmaneke bingehîn e ji bo bi temamî ji holê rakirina komploya tarî ya li dijî gel. Em dê ji bo jiyaneke demokratîk, adîlane, azadîxwaz û wekhevîxwaz li dijî Komploya Navneteweyî ya 15ê Sibatê û encamên têkoşîna xwe bidomînin. Em careke din teqez dikin ku êdî dema avakirina Tirkiyeyeke azad û demokratîk e.”
ÎZMÎR
Li navçeyên Îzmîrê jî bi awayên hemwext daxuyanî hatin dayîn. Li navçeya Konakê, Menemenê, Bayrakliyê û Torbaliyê daxuyanî hatin dayîn.
Meclîsa HDKê ya Îzmîrê û Rêxistina DEM Partiyê ya Îzmîrê li dijî komploya navneteweyî li cihê bazarê ya Çîmentepeyê daxuyanî da. Di daxuyaniyê de pankarta “Bi ronahiya heqîqetê ber bi azadiyê ve” hate vekirin û dirûşmên “Hezar silav li Girava Îmraliyê” û “Mifteya çareseriyê li Îmraliyê ye” hatin berzkirin. Daxuyaniyê Hevserokê Navçeya Konakê ya DEM Partiyê Bahaddîn Ozen xwend. Bahaddîn Ozen da zanîn ku Rêberê Gelê Kurd Abdullah Ocalan ji 15ê Sibat a 1999an ve li Girtîgeha Îmraliyê di bin şert û mercên giran ê tecrîdê de tê girtin lê bi têkoşîna xwe ya ji bo aştiyeke birûmet û demokratîkbûnê, ev komplo pûç kir û ev tişt gotin. “Îro ya ku rastî êrişan tê, paradîgmaya Birêz Ocalan e. Hêzên li dijî Pêvajoya Aştî Civaka Demokratîk, bi operasyonên têgehan, bi weşanên dezenformasyonê yên saziyên medyaya şerê taybet û bi artêşa trolên medyaya dîjîtal, konsepta êrişeke piralî dane destpêkirin. Em ê bi israra xwe ya ji bo çareseriya demokratîk a pirsgrêka Kurd û aşitiyeke birûmet, van êrişan careke din pûç bikin.” Daxuyanî bi berzkirina dirûşman bi dawî bû.
MENEMEN
Meclîsa HDKê ya Îzmîrê û rêxistina DEM Partiyê ya Menemenê li dijî komploya navneteweyî li Parka Asarlik a Demokrasiyê yê daxuyaniyek dan. Daxuyaniyê de dirûşmên “Hezar silav li girava Îmraliyê’”û “Mifteya çareseriyê li Îmraliyê ye” hatin berzkirin. Hevserokê Navçeya Menemenê ya DEM Partiyê Yoldaş Çîftçî daxuyanî xwend.
BAYRAKLI
Meclîsa HDKê ya Îzmîrê û rêxistina DEM Partiyê ya Bayrakliyê li dijî komploya navneteweyî li ber cihê Bazarê ya Nafîz Gurman daxuyaniyek dan. Daxuyaniyê de dirûşmên “Hezar silav li girava Îmraliyê’”û “Bijî Serok Apo” hatin berzkirin. Hevseroka Navçeya Bayrakliyê ya DEM Partiyê Fatma Karabay daxuyanî xwend.
TORBALI
Meclîsa HDKê ya Îzmîrê û rêxistina DEM Partiyê ya Torbaliyê li dijî komploya navneteweyî li taxa Ataturk daxuyaniyek dan. Daxuyaniyê de dirûşma “Bijî Serok Apo” hate berzkirin. Daxuyanî ji aliyê Hevserokê Navçeya Torbaliyê ya DEM Partiyê Yavûz Aras ve hate xwendin.
DENÎZLÎ
Rêxistina DEM Partiyê ya Denîzliyê jî li dijî komploya navneteweyî daxuyaniyek da. Daxuyaniyê de dirûşma “Bijî Serok Apo” hate berzkirin. Daxuyanî ji aliyê Cevahîr Kayar ve hate xwendin.
