Endamê DEM Partiye yê Enqereyê Fahrettîn Durmaz di şermezarkirina komploya navneteweyî ya li dijî Rêberê Gelê Kurd Abdullah Ocalan de axivî bi lêv kir ku azadiya Abdullah Ocalan ji bo pêşeroja hemû civaka Kurdistan û Tirkiyeyê pêdiviyeke.
Rêxistina Partiya Wekhevî û Demokrasiyê ya Gelan (DEM Partî) a Enqereyê tekildarî salvegera komploya navneteweyî ya li dijî Rêberê Gelê Kurd Abdullah Ocalan li ber avahiya xwe ya navçeya Çankayayê daxuyanî da. Endam û nûnerên partî û saziyên giredayî Platforma Saziyên Demokratîk a Enqereyê jî beşdarî daxuyaniyê bûn. Di daxuyaniyê de pankarta li ser, “Ji komployê re na azadî ji bo birêz Ocalan” dinivisî hat hilgirtin. Metna daxuyaniyê ya Kurdî ji aliyê endamê DEM Partî Fahrettîn Durmaz ve hate xwendin.
Fahrettîn Durmaz anî ziman ku komploya navneteweyî di heman demê de li dijî hêviya gelên Kurdistan û Rojhilata Navîn êrişek bû ye û got ku komplo ji aliyê dewletên navneteweyî ve li dijî pêşengê demokratîkirinê yê Rojhilata Navîn hatibû plankirin. Tatligul Gul bi lêv kir ku Abdullah Ocalan bi paradigma û berxwedana 26 salan a li Girava Îmraliyê armanca komployê pûç kiriye û wiha dirêjî da axaftina xwe: “Derketina Birêz Ocalan li ser qada dîrokê, mohra “em hene” ya gelê ku zincîrên înkarê lê hatibûn danîn e. Qonaxa dîrokî ya ku gelê Kurd bi têkoşîna xwe ya azadiyê ya 52 salan gihîştiye, êdî demeke wisa afirandiye ku tu hêz nikare bibêje “Kurd tune ne”. Îro îradeya gelê me, ramana wî û rêxistinbûna wî, nîşana herî berbiçav a vê rastiyê ye.”
‘Azadiya birêz Ocalan pêdiviyeke’
Di berdewama axaftina xwe de Durmaz destnîşan kir ku tecrîda li ser Abdullah Ocalan ne tenê li dijî kesayetekî ye di heman demê de li dijî gelekî ye û wiha pêde çû: “Ji ber vê yekê, azadiya fizîkî ya Birêz Ocalan, ji bo paşeroja demokratîk a gelê Kurd û hemû civaka Tirkiyeyê, pêdiviyeke. Îro gelê Kurd li qadan bi dirûşmeyên, “Bê Serok jiyan nabe” vê rastiyê bilind dike. Em jî weke parçeyek ji vê kampanyaya dîrokî, di biryardariya mezinkirina têkoşîna gelê Kurd û hemû hêzên demokrasiyê de ne. Niha erkê ku dikeve ser milê me, ew e ku em vê meşaleyê dest bi dest bigerînin, li çar aliyên cîhanê belav bikin û rêya azadiya Birêz Ocalan vekin. Azadiya Birêz Ocalan, ji bo aştiya gelan û paşeroja demokratîk gaveke herî berbiçav e. Dema ku em li dijî komployê dengê xwe bilind dikin, bila em dengê azadî û aştiyê jî bi hev re mezin bikin.”
