Amed – Berdevkê Meclîsa Ekolojiyê ya Amedê Sabrî Kiliç diyar kir ku wan li Amedê Komuna Çandiniyê ava kiriye û ew ê li dijî talankirina xwezayê rabin û bi komunan ekolojiyê biparêzin. Kiliç got ku wan li dijî talanê bi sedhezaran berû çandin e.
Pevajoya di sala 2015an ji aliyê dewleta Tirk ve hat xirakirin û her aliyê êrişêk berfireh da destpêkirin. Bênavber 10 salan şer berdewam kir. Di encama şerên dijwar de gelek daristan ji aliyê leşkerên Tirk û cerdevanan ve hate talankirin. Her wiha dewleta Tirk ji bo şerên taybet pêş bixe rê da şîrketan ku zozan û çiyayên Kurdistanê talan bikin. Şîrket bi hevkariya leşkeran kanên madenê ava dikin û xwezayê talan dikin.
Li dijî wan gelek bajarên Kurdistanê têkoşîna ekolojîk heye. Tevgera Ekolojiyê ya Mezopotamyayê li dijî talankirina xwezayê dest bi xebatên çandina berûyan kiriye û Komuna Çandiniyê ava kiriye.
Berdevkê Meclîsa Ekolojiyê ya Amedê Sabrî Kiliç têkildarî xebatên çandina berûyan û Komuna Çandiniyê axivî.
‘Em li dijî talanê xwedî li xwezaya xwe derkevin’
Sabrî Kiliç diyar kir ku di encama şerê 50 salî de ku li Kurdistanê qewimî komkujiyên ekolojîk derketin holê û wiha axivî: “Li her derî aliyê Kurdistanê xweza hat talankirin. Îro li welatê me behsa aştî û avakirina civaka demokratîk tê kirin. Lê xebatên sermayayê ya talankirina xwezayê hê jî didome. Ew xebatên sermayayê bi hişmendiya mêtingeriyê pêk tên. Berê talankirin bi polîtîkayan şer pêk dihat îro ew hatiye guherandin û bi navê polîtîkayên pêşketinê berdewam dike. Li her cihî kanên petrolê, xebatên gaza zinaran, çêkirina bendavan, kanên madenê, kanên xîzê tên çêkirin û talankirina daristanan pêk tê. Her wiha projeyên GESê hene. Tê xwestin ku bi talankirina xwezayê mirov neçar bihêlin û wan koçî bajaran bikin. Li dijî vê Tevgera Ekolojiyê ya Mezopotamyayê biryar da ku bi milyonan daran û bi taybetî darên berûyan li Kurdistanê bê çandin.”
‘Me li Amedê Komuna Çandiniyê ava kiriye’
Sabrî Kiliç destnîşan kir ku heta niha li Wan, Amed, Mêrdîn, Şirnex, Mûş, Colemêrg, Erzirom û Çewligê bi sedhezaran berû hatine çandin û got: “Heta ku em hejmara çandina darên berûyan bigihînin bi milyonan wê xebatên me berdewam bikin. Her cihê ku lê jiyan hebe, em ê li wir xebatên çandiniyê bikin. Têkoşîna parastin û pêşxistina nirxên komûnal ên Mezopotamyayê ya ku bi hezaran salan berdewam dike, bi avakirina komunên ekolojîk û kooperatîfan dê îro jî berdewam bike. Me li Amedê; Komuna Çandiniyê bi vê armancê ava kiriye. Ji aliyê Komûna Çandiniyê ve bi milyonan berû li Amedê hatine komkirin, me çandiniyê daye destpêkirin û dê çandina berûyan bidome. Em ê aştî û nirxên komunalîteyê ava bikin û li her derê bikin daristan. Em ê komunên ekolojîk ava bikin û li dijî sermayeyê têbikoşin.”
