Amed – Rêveberên DBPê Ahmet Ertak û Bêrîvan Bahçecî ku duh tev li kongreya partiya xwe bûn diyar kirin ku dê Konferansa Yekrêziya Kurdî bibe wesîleya bidestxistina statuya gelê Kurd û heke gelê Kurd destê xwe bidin hev dê hemû êrişên li ser gelê kurd tên meşandin bên pûçkirin.
Li bajarê Qamişlo yê Bakur û Rojhilatê Sûriyeyê di 26ê Nîsanê de Konferansa Yekrêzî û Yekhelwesta Kurdî li Rojavayê Kurdistanê” hate lidarxistin. Ji Rojava, Bakur û Başûrê Kurdistanê û deverên din ên Sûriyeyê, nûnerên partî û hêzên kurdî û Kurdistanî zêdetirî 400 delege beşdarî konferansê bûn. Rêveberê Partiya Herêmên Demokratîk (DBP) yê ji Karên Dîplomasiyê Berpirsyar Ahmet Ertak û Berdevka Meclisa Jinan a DBPê Bêrîvan Bahçecî ku duh tev li kongreya partiya xwe ya Amedê bûn têkildarî Konferansa Yekrêzî û Yekhelwesta Kurdî axivîn.
Rêveberê DBPê yê ji Karên Dîplomasiyê Berpirsyar Ahmet Ertak bal kişand ser geşedanên li Bakur û Rojhilatê Sûriyeyê û Sûriyeyê diqewimin û wiha got: “Di vê demê de pêwîstî bi çi heye? Pêwîstiya herî sereke yekitiya di nava gelê kurd de ye. Heke ku gelê kurd di vê demê de li çar parçeyê Kurdistanê yekitiya xwe ya neteweyî pêk neîne wê dîsa bi hovitiyên sedsala 20emîn re rûbirû bimîne. Çawa ku di şerê cîhanê yê yekemîn de kesê kurd nas nekirin wê di vê demê de jî wê nas nekin.”
‘Wê ev konferans bibi wesîleya aştiyeke bêhempa’
Ahmet Ertak, bi bîr xist ku Rêberê Gelê Kurd Abdullah Ocalan ji bo yekitiya neteweyî ya kurd pêk were gelek caran bang kiribû û wiha bi lêv kir: “Li Rojava bi hemû pêkhateyên gelê kurd konferansek hate lidarxistin. Wê ev konferans bibe wesîleya rêvekirina her çar parçeyê Kurdistanê û statuya gelê Kurd bi awayekî were bidestxistin. Ji ber vê çendê em vê konferansê dîrokî dibînin. Gelê Kurd di dîrokê de her tim rastî êrişên cuda hatiye. Lê belê di vê serdemê de yekitiya xwe pêk bîne, em di wê baweriyê de ne ku dê ji bo gelê kurd bibe wesîleya aştiyeke bêhempa.”
‘Heke yekitî pêk neyê wê pirsgirêka Kurd jî neyê çareserkirin’
Ahmet Ertak di berdewamiya axaftina xwe de ev tişt gotin: “Serokê Gelê Kurd Birêz Ocalan ji salên 90î ve her tim digot çarenûsa pirsgirêka Kurd yekitiya gelê Kurd e. Heke yekitiya gelê Kurd nebe wê demê dê çarenûsa pirsgirêka kurd jî nebe. Ji ber vê yekê divê ev konferans li bakurê Kurdistanê jî mînak were girtin. Di demekî nêz de hemû neteweyên cuda yên li Kurdistanê, hemû ol û baweriyên cuda yên li Kurdistanê bên bahevdû û vê yekitiyê tacîdar bikin. Ew rengê derkeve pêşiya me. Wê ev yek ji bo gelê kurd di cîhanê de deng bide.”
‘Tişteke pîroz e ku gelê Kurd di vê pêvajoyê de dengê xwe bike yek’
Berdevka Meclisa Jinan a DBPê Bêrîvan Bahçecî jî diyar kir ku di pêvajoyeke girîng de derbas dibin û wiha got: “Ev konferansa yekrêziya Kurd a di vê pêvajoyê de pir bi qiymet û watedar e. Ji bo ev konferans pêk were gelek xebat hatin meşandin. Ji ber ev konferans di pêvajoya banga ‘Aştî û Civaka Demokratîk’ de pêk hatiye bêtir watedar e. Ji ber wê jî weke gelê Kurd ê li Bakûr em gelek bikelecan in. Ji ber ku demekî dirêj bû Rêberê Gelê Kurd Birêz Abdullah Ocalan behsa yekitiya gelê kurd dikir. Behsa pêkhatine konferanseke bi vî rengî dikir. Ji ber wê em vê pêvajoya niha pir girîng dibînin. Gelê Kurd di vê pêvajoyê de dengê xwe bike yek tişteke gelek pîroz e. Ji niha ve ev konferans li hemû gelê kurd pîroz be. Em serkeftinê jê re dixwazin. Gelê kurd û her çar parçeyê Kurdistanê destê xwe bidin hev dê hemû êrişên li ser gelê kurd tên meşandin û lîstikên dewletên navneteweyî dê bên pûçkirin. Em dixwazin ev yekitî bi lez û bez pêk were.”
‘Sedsala 21emîn dê bibe sala azadî û yekitiya gelê Kurd’
Bêrîvan Bahçecî destnîşan kir ku dê konferans bandorê li pêvajoya heyî ya li bakurê Kurdistan û Tirkiyeyê jî bike û ev tişt gotin: “Bi hezar salan e her tim xwestine gelê kurd parçe bikin û sînoran têxin nava wan. Dixwazin her tim gelê Kurd parçe bikin. Ji ber vê yeke ev konferans pir bi watedar e. Sedsala 21emîn dê bibe sala azadî û yekitiya gelê Kurd. Ji ber wê jî gelê kurd dê ji niha şûnde yekitiya xwe bêtir xurt bike. Dê ev konferans vê pêvajoyê bêtir serbixîne. Peyameke baş ji temamê dewletan re hate dayîn. Em di wê baweriyê de ne ku wê ev konferans serbikeve. Ji gelê Kurd re serkeftin.”
