Nûnertiya Koordînasyona Kongra Star a Başûr û Meclisa Jinan a PYDê, starta çalakiyên 25ê Mijdarê da.
Nûnertiya Koordînasyona Kongra Star a Başûr û Meclisa Jinan ya PYDê bi daxuyaniyekê starta çalakiyên 25ê Mijdarê Roja Têkoşîna li Dijî Tundiya Ser Jinê ya Navneteweyî da.
Jinan li Nûnertiya PDYê ya başûrê Kurdistanê ya li Silêmaniyê daxuyanî da. Endama Komîteya Rêveber a Meclisa Jinan a Partiya Yekîtiya Demokratîk (PYD) Bêrîvan Mihemed daxuyanî xwend.
Bêrîvan Mihemedê diyar kir ku ew destpêkê xwişkên mîrabel ku bi têkoşîna xwe ya li dijî desthilatiyê mîrasa berxwedan û berdêldayînê ji wan re hiştiyî û bûyî sedem ku ev roj weke roja têkoşîna li dijî şiddetê bê destgirtin, bi rêzdarî bibîrtînin.
Bêrîvan Mihemedê da zanîn ku di şexsê van têkoşerande ji dîrokê heta îro hemû qehreman, têkoşer, fedekar û rênîşanerên wan ên hêja Rosa Luksenburg, Sakine Cansiz, Şîlan Kobanê, Sosin Bîrhat, Yusra, Leman, Aryen Mako, Gulistan, Hêro Bahadînan û bi hezaran têkoşerên din, bi rêzdarî bibîrtînin û soz didin ku dê doza wan hîn mezintir bikin.
Bêrîvan Mihemed anî ziman ku weke tevgera Kongra Star ji avabûyînê heta niha li ser mîrasa berxwedayîna kesên ji bo azadiyê berdêl dayî em meşiyane û mezin bûne û wiha got: “Em xwedî li ked û berxwedayîna wan derketine. Îro jî li dijî zihniyeta cîhadîst bi hemû hêza xwe a siyasî, polîtîk, civakî em têkoşîneke bê hempa didin meşandin. Li her deverekê Kurdistanê siyaseteke cuda hate meşandin. Îro li Sûriye jî bi rejîma ku anîne ser hukum ve siyaseteke rasterast ku jinê hedef digire û jinê bê îrade bihêle tê meşandin. Em viya şênber jî di qanûnên ku tên derxistin ên li dijî îradeya jin, di siyasetê di qadên jiyanê ên din de rênedayîna jin, heta derketina jin a derve, cil û berg de zextên ku li ser tên de dibînin. Ji aliyekêve pergala me a rêveberiya xweser bi hemû hêza xweve û bi têkoşîneke mezin ve dixwaze jinê bi îrade bike, ji bo wê jî hewldan dike, ji milê din ve pergaleke ku ji hêla cîhadîstan ve tê meşandin ji bo ku jinê hîn zêdetir têxe bin erdê, ji civakbûyînê qut bike hewldan dike. Desthilatiyê teybet van salên dawîde zêdetir li ser olperestî û zayendperestiyê kar kir. Teybet jî ji bo ku zayendperestiyê kûrtir bike ev beşên îslama radîkal xwedî rol kirin. Li Efganistanê Talîban, li Sûriye HTŞ ji ber wê yêkê bicih kirin û rê dane. Îro di şexsê van tevgeran de îradeya jin heta dawiyê tê şikandin, bê nasname, bê îrade tên hiştin. Eger jin xwedî rêxistin nebe neçar dimîne ku li beramberê qanûnên wan ên hovane serî bitewîne.”
Bêrîvan Mihemed bilêv kir ku di şexsê jinên Suweyda, jinên li sahilde me dît ku jina ku ne rêxistinkirî be rûbirûyê çi pêkanînan tê. Wek jin pêwîste em viya baş bizanibin ku tu dewlet piştgiriya azadiya jinan nake. Tu dewlet jî naxwaze jin xwedî îrade be. Ev di mînaka van deran de eşkere hate dîtin. Teybet îsal jinên li Suweydayê, li sahilê hatîn qetilkirin û yên ku hatî revandin di bajarande hatî firotin cihê şermeke mezin e. Ev şerma hemû cîhanê, hemû mirovahiyêye. Tenê ji bo van jinan nabe jî pêwîste jinên ku van kiryaran qebûl nake, jê acize pêwîste deng derxe. Bêdengî jî şermeke mezin e. Di çalakiyan de hêza xwe kirina yek wê encamên berbiçav jî derxe holê.”
Jinan li başûr gelek bedel dane
Bêrîvan Mihemed anî ziman ku Başûrê Kurdistanê jî xwedî mîraseke berxwedanêye û got: “Em ji Leyla Qasiman bigirin heta Viyan Soranan, Hêro Bahadînan di têkoşîna azadiya jin de gelek berdêl hatiye dayîn. Li hemberê vê berxwedayîna jin li pergala dewleta Iraqê de jî xeteriyên mezin ji bo jin hene. Teybet van salên dawîde qanûnên li dijî jinê ên bin navê yasaya rewşa kesî ku derdikevin, dide nîşandan ku îradeya jinê bi rêya qanûnan jî dixwazin bişkênin, zayendperestiyê mayînde û meşrû bikin. Dîsa di yasayên Iraqêde kûrkirina zewaca temenê biçûk û pirjiniyê heye. Li hemberê van pêkanînan em dizanin ku jin tu carê bêdeng namîne. Ji ber ku jinên li vê heremê xwedî mîrateyeke berxwedanê a kevnar in.”
