Bi milyonan Kurd, li gelek welatên Ewropa û bajarên çar parçeyên Kurdistanê kom bûn û li dijî êrîşên li ser gelê Rojava bi Ruhê Kobanê heta serê sibê nobet girtin. Ciwanên kurdan sînor derbas kirin û berê xwe dan Rojava û çek hilgirtin.
Piştî komên çeteyan ên HTŞ, SMO û DAIŞê bûn yek û bi piştgiriya Israîl, Fransa û Tirkiyeyê êrîşî gelê Kurd kirin, li çar aliyê cîhanê bi milyonan kurd tevî sazî û rêxistinên xwe seferberî îlan kirin û derketin qadan. Bi milyonan Kurd ji Silêmaniyê heta Hewlerê, ji Duhokê Heta Zaxoyê, ji Qamişlo heta Hesekê, ji Kobanê heta Dêrikê, ji Nisêbînê heta Dêralok û Şeladizê, ji Şengalê heta Mexmûrê, ji Wanê heta Amedê, Ji Mêrsînê heta Êlihê, ji Holandayê heta Almanyayê, ji Zûrihê heta gelek bajarên Ewropayê li hev kom bûn û ji bo êrîşên li dijî gelê Rojava şermezar bikin heta serê sibê nobet girtin. Bi milyonan jin û ciwan, kal û pîr, alên YPJ, YPG û HSDê hilgirtin û bi dirûşmeyên xwe piştgiriya xwe ya ji bo gelê Rojava diyar kirin. Piştî banga seferberiyê ya Rêveberiya Xweser li Qamişlo, Kobanê, Hesekê, Cizîr û gelek bajar û navçeyên Bakur û Rojhilatê Sûriyeyê jin û ciwanan çek hilgirtin û li dijî êrîşên HTŞ, SMO û çeteyên girêdayî Tirkiyeyê nobet girtin. Bi milyonan kurdên ku li çar parçeyên Kurdistanê û Ewropayê seferberî îlan kirin, bang li hêzên navdewletî kirin û xwestin êrîşên li ser Rojava rawestînin.
Bi êrîşên komên çeteyan ku hêz û piştiriyê ji Tirkiye, Israîl, Îngîltere, Fransa û Amarîkayê digirin, piştî ketin Reqa û Dêra Zaro ewil girtiyên DAIŞê ji girtîgehan derxistin û kampa Holê vala kirin. Bi taybetî piştî ku HTŞê bi hezaran çeteyên DAIŞê yên li kampên Holê û girtîgehên Reqayê serbest berdan, tirs û xofa gel a ku dîsa wekî salên 2014-2015an komkujiyê bike zêde bûn. Bi milyonan gelê Kurd hem ji bo destkeftiyên Rojava biparêze, hem ji bo li nasnameya xwe û pergala Rêveberiya Xweser xwedî derkeve û hem jî ji bo rê li pêşiya komkujiyên mezin ên li ser civakê û baweriyan asteng bike, derketin kolanan û meşên girseyî li dar xistin. Li hin cihan êrîşî nivîsgehên saziyên Tirkiyeyê kirin. Li hin cihan sînorderbas kirin û berê xwe dan Rojava, li hin cihan jî li pêş parlamentoyên welatan çalakiyên girseyî lidarxistin û heta seetên serê sibê nobet girtin.
Bi milyonan kurdên ku li çar parçeyên Kurdistanê û welatên cîhanê daketin qadan, nîşanî hemû dewletên cîhanê dan ku êdî Ruhê Kobanê zindî ye û tu carî namire. Nişan dan ku li her derê li dijî şer yekîtiya xwe îlan kirine û li ku dibe bila bibe, dema li dijî kurdekî an jî bajarekî Kurdan êrîş pêk bê, li her derê dikarin dakevin qadan bertek û nerazibûnên xwe bînin ziman. Kurdan bi yekîtiya xwe sînor ji holê rakirin û helwesta xwe ya li dijî dagirkirin, talankirin, kuştin û înkarê anîn ziman.
