Leşkerên artêşa Iraqê ev du roj in li Kerkûkê astengiyan ji cotkarên Kurd re derdixin. Di dîmenek li ser medya dîjîtal hat belavkirin de tê dîtin ku leşkerên Iraqê îşkence li cotkarekî dikin.
Leşkerên artêşa Iraqê ev du roj in li gundê Şenaxeyê yê Kerkûkê bicih bûne û astengiyê ji cotkarên Kurd zeviyên xwe diçînin re derdixin. Cotkarên gund jî li dijî hêzên ewlekariyê li ber xwe didin û dibêjin, “Ev der milkê me ye, em qebûl nakin ku astengiyê ji me re were derxistin.”
Li gorî nûçeya ROJ NEWSê; piştî ku duh hêzeke artêşa Iraqê çûye gundê Şenaxeyê li sînorê bajarokê Sergeranê û astengî ji cotkaran re kirin ku erdên xwe biçînin, cotkarên gund li hemberî hêzê sekinîne û li ser erdên xwe mane.
Cotkarekî Kurd ku nexwest navê wî were eşkerekirin derbarê mijarê de ev yek anî ziman: “Em Kurdên gundê Şenaxeyê tapoya reş ya erdên me heye ku îspat dike ev erd yên me ne. Lê hêzên Iraqî astengiyê derdixin ku nahêlin em zeviyên xwe biçînîn. Em jî vê yekê qebûl nakin ji ber ku milkê me ye.”
Her wiha li gorî çavkaniyên herêmî, ji ber piştgiriya Kurdên gundê Şenaxeyê efserekî artêşa Iraqê bi navê Rêber Mizûrî hatiye cezakirin.
Hatina vê hêza artêşa Iraqê piştî wê tê ku heftiya borî hemû îtirazên li ser proje yasaya Yasaya Vegerandina Milkan ji xwediyên wan yên resen re hat redkirin û ji bo bikeve meriyetê ji aliyê Serokkomar ve jî hat îmzekirin.
Leşker îşkence li cotkarê Kurd dikin
Li aliyê din di dîmenek li ser medya dîjîtal hat belavkirin de; leşkerên Iraqê îşkence li welatiyekî ango cotkarek Kurd dikin. Di dîmen de tê dîtin ku leşker kember-qayîş avêtine stûyê cotkarê li ser traktorê û stûyê wî kaş dikin. Di dîmen de hovîtî û îşkenceya li dijî cotkar radixe ber çavan.
