Li Mêrdînê û Cizîrê desteserkirina şaredariyên Mêrdîn, Êlih û Xelfetiyê bi daxuyaniyan hat şermezarkirin. Di daxuyaniyan de hate gotin ku divê dev ji polîtîkaya qeyiman bê berdan.
Di 4ê Mijdara 2024an de li ser fermana Wezareta Karên Navxwe qeyim tayînî şaredariyên Mêrdîn, Êlih û Xelfetiyê hatibûn kirin. Di salvegera yekemîn de tayînkirina qeyiman li Mêrdînê û Cizîrê hate şermezarkirin.
Mêrdîn
Platforma Saziyên Demokratîk a Mêrdînê li Parka Karayollariyê ya navçeya Artûklûyê bi tevlibûna endam û rêveberên partiyên siyasî û saziyên civaka sivîl daxuyanî da. Di daxuyaniyê de pankarta, “Ne qeyim ne darbeyên siyasî, gel wê serbikeve” hat vekirin.
Di daxuyaniyê de Hevşaredara Bajarê Mezin a Mêrdînê Devrîm Demîr bal kişand ser polîtîkayên qeyûm û got: “Bi sedan salan e li dijî van polîtîkayan gelê me li ber xwe da û wê berxwedana gelê me berdewam bike.”
Devrîm Demîr got ku divê dewlet bi awayekî erênî nêzî Pêvajoya Aştî û Civaka Demokratîk bibe û axafrtina xwe wiha bi dawî kir: “Banga Birêz Ocalan av 27ê Sibatê bangeke dîrokî ye û divê dewlet li gor rihê pêvajoyê tevbigere. Êdî gavên şênber biavêje. Îro fersendek ketiye destê dewletê û divê dewlet dev ji polîtîkayên qeyûm berde. Em ji vir bang dikin. Vîna gel radestî gel bikin, encax bi vî awayî hûn dikarin baweriyê bidin gel.”
Piştî Demîr Hevserokê DEM Partiyê yê Mêrdînê Nîhat Gokalp jî got ku divê roj ji rojekî zûtir divê komisyona li Meclîsa Tirkiyeyê hatiye avakirin bi Rêberê Gelê Kurd Abdullah Ocalan re hevdîtinê pêk bîne.
Piştî axaftinan daxuyanî bi çalakiya rûniştinê bi dawî bû.
Cizîr
Li Kolana Hunerê ya navçeya Cizîrê ya Şirnexê jî bi munasebeta 4ê Mijdarê ya desteserkirina şaredariyan daxuyanî hat dayîn. Parlementera DEM Partiyê ya Şirnex Newroz Ûysal Aslan, endam û rûveberêb partiyên siyasî û saziyên civaka demokratîk tev li daxuyaniyê bûn. Di daxuyaniyê de pankarta, “Ne qeyim demokrasî” hat vekirin. Daxuyanî ji aliyê Hevserokê DEM Partiyê yê Cizîrê Yilmaz Sanri ve hat xwendin. Piştî Sanri Parlementer Newroz Ûysal Aslan bal kişand ser tundiya li ser siyaseta gelê Kurd û got: “Dewlet bi qeyiman dixwaze vîna gelê desteser bike. Bi polîtîkayên qeyim vîna gelê Kurd tune dihesibîne.”
Newroz Ûysal Aslan di berdewama axaftina xwe de diyar kir ku bi van polîtîkayan çareserî çênabe û axaftina xwe wiha bi dawî kir: “Êdî tehamula gelê Kurd nemaye ku rêberê wan di zindanê de be. Ger qala pêvajoyekî tê kirin divê dewlet demildest girtiyên nexweş berde û azadiya fîzîkî ya Rêberê Gelê Kurd pêk were, yan bi vî awayî çareserî çênabe. Heya ku deriyê zindanan neye vekirin berxwedana me wê berdewam bike.”
Piştî axaftina Ûysal Aslan daxuyanî bi lêdana çepikan bi dawî bû.
