TJA, DBP, DEM Partî, Dayikên Aştiyê û saziyên sivîl ên Şirnexê li dijî qetilkirina jinan li navçeya Cizîrê çalakiya meşiyan û bertek nîşanî qetilkirina jinan dan.
Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî), Dayikên Astiyê, Baroya Şirnexê, Malbata Sabahat Atabey a di van demên dawî de hat qetilkirin, saziyên sivîl ên Şirnexê û gelek kesan li dijî qetilkirina jinan li Kolana Hunerê ya navçeya Cizîrê ya Şirnexê meşiyan. Girse li Kolana Hunerê kom bûn û li wir heta Medresa Sor meşiyan. Di meşe de pankarta “Kuştina jinan polîtîk e”, wêneyê jinên di demên dawî de li Şirnexê hatibûn qetilkirin û dovîzên “Jinên hatine qetilkirin raperîna me ne”, “Em ne di şînê de ne em serhildanê de ne”. Girseyê bênavber dirûşmeyên, “Jin jiyan azadî”, “Destên dirêjî jinê dibin bila bişkên” û “Kuştina jinan polîtîk e” berz kirin.
Meş li ber berderiyê Medresa Sor bi dawî bû. Xwişka Sebahat Atabay, Emîne Gokçek di çalakiyê de axivî. Emîne Gokçek bertek nîşanî qetilkirina jinan da û got: “Jin jiyan in. Divê jin neyên kuştin. Em kuştina jinan şermezar dikin.”
‘Li dijî qetilkirina jinan bi hers in’
Piştrê jî metna daxuyaniyê ji aliyê endama TJA Nafiye Geçgel ve hat xwendin. Nafiye Geçgel anî ziman ku ew li dijî qetilkirina jinan bi hers in û wiha got: “Em dibînîn ku her roj li Kurdistan û metropolên Tirkiyeyê jin rastî polîtîkayên tunehesibandinê û tundiyê tên. Di encama van polîtîkayên hişmendiya desthilatdariya mêran de her roj li dewereke cuda, bi hincetên cuda geh ji aliyê hêzên ewlehiyê ve, geh ji aliyê mêran ve jin tên qetilkirin û kuştin. 22yê hezîranê li Silopiya Gulîzar Yildiz ji aliyê hişmendiya mêran ve hate qetilkirin. Kujerê Gulîzarê bi gotina; ‘Heger derdor mudaxaleyî min nekiriya min ê serê wê ji jê bikira’ destnîşan dike ka hovanî û tundiya li hember jinê çiqas bi awayekî dijwar tê meşandin. 26ê hezîranê ji Sebahat Atabey li Edeneyê ji aliyê zihnîyeta mêran ve hate qetilkirin. Kuştina jinan bi vî awayî her roj bi şêwazek sistematik berdewam dike. ”
‘Em ê têkoşîna xwe bidomînin’
Nafiye Geçgel destnîşan kir ku polîtikayên bêcezahiştinê rê li pêşiya qetilkirina jinan vedike û xwest peymana Stenbolê bikeve meriyetê û tundiya li dijî jinan bê cezakirin. Nafiye Geçgel bi lêv kir ku ew ê li dijî kuştina jinan têkoşîna xwe mezin bikin û ev tişt gotin: “Em ê keda jinê, hebûna jinê, reng û dengê jinê bi her awayî tevî hemû tundî û polîtîkayên qirkirinê, li her qadê û di hemû platform, sazî û dezgehan de biparêzîn û geş bikin. Ji bo ku Sebahat bijîn em li vê qadê ne. Ji bo Gulîzar, Fîrdews, dayika Teybet bijî em li vê qadê ne. Ji bo kujerên jinan bê ceza nemînin em li vê qadê ne,. Ji bo parastina ked û nirxên jinê yên di nava civakê de bê dîtin em li qadê ne. Em careke din kujerê Sebahat Atabey û pergala li pişt vê hişmendiyê disekine bi tundî şermezar dikin, mehkûm dikin û rûreş dikin.”
Komîsyona Jin û Zarokan a Baroya Şirnexê parêzer Emîne Ozdemîr û hevberdevka DÎSK Genel Îşê Siyajin Buruntekîn jî axivîn û bertek nîşanî qetilkirina jinan dan.
Daxuyanî bi çepik û berzkirina dirûşmeyan bi dawî bû.
