Şirnex – Di saetên serê sibê de li ser rêya Elkê û Şirnexê hezaz çêbû û rê ji trafîkê re hate girtin. Welatiyan diyar kir ku ji ber rê hate girtin mexdûr bûn û rê piştî çar saetan hate vekirin.
Li herêma Komate ya navçeya Elkê ya Şirnexê ku nêzî gundê Bêrmanê yê navçeya Elkê ye di saetên serê sibê de ji ber hezaz çêbû rê hate girtin. Rêya ku ji Elkê diçe Şirnex û Colemêrgê bi saetan girtî ma û gelek welatî di rê da man. Welatiyên ku di rê da man dan zanîn ku ji bo rêyê vekin li tîmên Rêya Bêjahiyê geriyan e lê wan gotiye ku makîneyên kar ên ku bikarin rê vekin di destên wan de nînin. Welatiyên ku em bi telefonê bi wan re axivîn, diyar kirin ku tîmên Rêya Bêjahiyê makîneyeke kar ji bajaroka Dêrahînê ya navçeya Qilebanê kirê kirine û anîne.
Gelek welatiyên ku ji bo Nexweşxaneya Dewletê ya Şirnexê randevû girtibûn an jî karê wan hebû jî mexdûr bûn. Welatî ji ber rê girtî bû neçar man ji wê herêmê vegerin û li ser rêya bajaroka Dêrahînê ya Qilebanê biçin Şirnexê. Welatiyan anîn ziman ku tîmên Rêya Bejahiyê bi makîneyê ku kirê kirine rê saet dora 11.00an vekirine.
Welatiyan destnîşan kir ku her demsala zivistanê an ji ber hezazê an ji ber barîna berfa zêde ev rê tê girtin û ji ber dereng tê vekirin mexdûr dibin. Welatiyan xwest ku ji bo ev mexdûriyet çênebe rayedar tedbîran bigirin û di rewşên wiha de demildest mudaxile bê kirin.
