Li Colemêrg û Geverê serdana gorên kesên di têkoşîna azadiyê de jiyana xwe ji dest dane hatin ziyaretkirin û peyama mezinkirina têkoşîna wan hat dayîn.
Li Colemêrg û Geverê, bi boneya Cejna Qurbanê, bi pêşengiya Partiya Wekhevî û Demokrasiyê ya Gelan (DEM Partî), Partiya Herêmên Demokratîk (DBP), Tevgera Jinên Azad (TJA) û Dayikên Aştiyê de gorên kesên ku di têkoşîna demokrasî û azadiyê de jiyana xwe ji dest dane hatin ziyaretkirin. Endamên partiyên siyasî û parlamenterê DEM Partiyê yê Colemêrgê Vezîr Parlak beşdarî serdana goristana Serê Solan a li Taxa Tekserê ya girêdayî navenda Colemêrgê bûn. Şandeya partiyê pêşî serdana gorên bêkesan û kesên ku di şer û pevçûnên di dîrokên cûda de jiyana xwe ji dest dane lê hatine veşartin kirin. Piştre, malbatên ku ji bo serdana goristanan hatibûn pêşwazîkirin û peyamên sersaxî û pîrozbahiyê hatin dayîn.
‘Em ê hêviyan wan bi aştiyê tacîdar bikin’
Parlamenter Vezîr Coşkun Parlak, li ser pêşketinên piştî “Banga Aştî û Civaka demokratîk” ya Rêberê Gelê Kurd Abdullah Ocalan axivî û diyar kir ku ragihandina fesihkirina PKK’ê piştî banga Birêz Ocalan, ji aliyê tevahiya raya giştî ya cîhanê ve piştgiriyek mezin wergirt. Vezîr Parlak wiha got: “Gelê Kurd jî bi civîna li Rojava piştî kongreya PKK’ê yekîtiya xwe ya neteweyî nîşan da. Têkoşîna azadiyê ya gelê Kurd bi saya kesên ku ji bo vê dozê canê xwe dan pêk hat. Em ê di vê pêvajoya dîrokî de berpirsiyariyê bigirin ser xwe û hêviyên hemû kesên ku me winda kirine bi aştî û azadiyê tacîdar bikin. Ez cejna hemû gelê Kurd û Rêberê wan pîroz dikim.”
Gever
Li navçeya Geverê jî goristanên li taxên Bajêrge (Akalın) û Ormanê hatin ziyaretkirin. Parlamentera DEM Partiyê ya Colemêrgê Oznur Bartın û parlamenterê berê yê HDPê Sait Dede serdana goristana Bajêrge, Parlamenterê DEM Partiyê Onur Düşünmez jî serdana goristana taxa Ormanê kir. Li her du goristanan jî gorên kesên di şer û pevçûnên ku di têkoşîna azadiyê ya 50 salan a gelê Kurd de qewimîn de jiyana xwe ji dest dane yek bi yek hatin ziyaretkirin. Piştî serdanan, kesên ku hatibûn goristanê hatin pêşwazîkirin, cejnên wan hatin pîrozkirin û sersaxî ji wan re hat xwestin
Serdanên li her du bajaran jî bi rêzgirtinê û xwendina duayan bi dawî bûn.
