Colemêrg – Hevserokê DEM Partiyê yê Geverê Ercan Sevmez ku têkildarî pêvajoyê axivî, bal kişand ser civînên gel û got: “Gel herî zêde ji bo aştiyê tênî ye.”
Rêberê Gelê Kurd Abdullah Ocalan, di 27ê Sibatê de bi “Banga Aştî û Civaka Demokratîk” pêvajoyeke nû ya aştiyê û demokrasiyê dabû destpêkirin. Ji bo têgihiştin û encamgirtina pêvajoyê Partiya Wekhevî û Demokrasiyê ya Gelan (DEM Partî) tevahî Kurdistanê dest bi civînin gel kir û gund bi gund tax bi tax, kolan bi kolan, mal bi mal bi gel re dicive. Li seranserê Colemêrgê jî civînên gel tên lidarxistin û gelê Colemêrgê eleqeyeke mezin nîşan dide. Li navçeya Geverê rêxistina DEM Partiyê diçe çiya û zozanan û bi bêrîvan, şivan û cotkaran re hevdîtan dike û nêrîn, pêşniyarî û rexneyên wan digire.
Hevserokê DEM Partiyê yê Geverê Ercan Sevmez, ji bo ajansa me pêvajoya nû nirxand û behsa civînin gel kir.
Ercan Sevmez, da zanîn ku banga Rêberê Gelê Kurd Abdullah Ocalan bandora xwe li ser hemû Rojhilata Navîn dike û got ku hêviyek gelek mezin ava kir. Ercan Sevmez, destnîşan kir ku li hemû cîhan û taybetî Rojhilata Navîn qeyranên gelek mezin pêkdihat û got: “Vê bangawaziyê ji bo hemû gelan û baweriyan hêviyeke mezin û nexşerêyeke çareseriyê da avakirin. Hêviya hemû gelên bindest têkoşîna gelê Kurd ya azadiyê ye û bi taybetî jî bi pêşengtiya jina azad li Rojhilata Navîn bandoreke xwe ya mezin heye. Destpêkirina diyaloga di navbera Birêz Ocalan û dewletê de ev hêviya gelan şênber û mezintir kir. Taybetî jî dîmena Birêz Ocalan ya piştî 26 salan kelecaneke mezin û ruheke cuda da avakirin. Bi vê dîmenê hinekî rengê pêvajoyê jî diyar bû. Ev pêvajo ne tenê ji bo aliyekê, lê belê ji bo hemû aliyan serkeftinê tîne.”
‘Modernîteya Kapîtalîst çareseriyê bi xwe re nayne’
Ercan Sevmez, anî ziman ku hêzên serdest dixwazin di Rojhilata Navîn de xwe dîsa birêxistin bikin û diyar kir ku çareseriya modernîteya kapîtalîst ji ti pirsgirêkên civakê re nebûye çareserî û ji îro şûnve jî nabe. Ercan Sevmez, da zanîn ku modernîteya kapîtalîst bi xwe re zêdetir nakokî, pirsgirêkên civakî dide avakirin û wiha pê de çû: “Ji hêla aboriyê, civakî, jinê, ekolojî û zanistiyê di her warî de pirsgirêkên heyî hêj kurtir dike.”
‘Deshilat weke hilbijartinî nêzî pêvajoyê dibe’
Ercan Sevmez, got ku desthilat bi çavekî “dê çawa di hilbijartinan de dîsa serbikeve” li pêvajoyê dinêre û ev tişt got: “Gelek giran pêvajoyê dimeşînin. PKKê kongreya xwe pêk anî û bersiveke dîrokî da. Vê helwesta PKKê bandoreke mezin hem li seranserê cîhanê hem jî li herêmê bandoreke mezin kir û gelê Kurd jî vê yekê berfirehî dinirxîne. Ji ber ku dewletê li hemberî vê gavê ti gav neavêtine baweriya gel kêm e. Her wiha gelek kesên naxwazin ev pêvajoya aştiyê bi ser bikeve hene, lewma divê dewlet û desthilat hinekî micidahî nêz bibin. Gav avêtina dewletê bedewariyeke mezin û micid e. Avakirina komîsyonê erênî ye, lê belê gelek lawaz û giranî dimeşe û ev yek jî gumanên gel mezintir dike.”
‘Daxwaz û gumanên Geveriyan hene’
Ercan Sevmez, bal kişand ser civînên gel û wiha berdewamî da axaftina xwe: “Bi destpêka pêvajoyê ve gelek civîn hatin kirin û me jî li Geverê mal bi mal xebat dabûn destpêkirin. Me serdana nêzî 5 hezar malan kir û niha jî em li zozanan, gundan û taxan civînên xwe didomînin. Me dît ku civak ji bo aştiyê pir tênî ye. Civakeke ku pir êş û elem kêşandî dîsa jî ji bo aştiyê gelek germ nêzîk dibe. Ev yek mirov gelek bandor dike. Lê belê gumanên gel gelek in. Fikir û ramanên Birêz Ocalan yên ji bo nexşerêya çareseriyê, çek danîna PKKê di gel de baweriyeke gelek mezin avakiriye û gel gelek ji Birêz Ocalan bawer e. Lê, nebaweriya gel bi dewletê heye û pratîkên dewletê yên di pêvajoyên beriya niha de sedema vê nebaweriyê ye. Gel gavên şênber ên weke rakirina qeyim, bidawîkirina talana li ser xwezaya Kurdistanê, destjêberdana hedefgirtina jinan, bidawîkirina zextên li ser girtiyan û guherandina terz û uslûb dixwazin. Hêj jî girtiyên nexweş di girtîgehan de ne, berdana girtiyên 30 salên xwe tije kirî tê taloqkirin, binçavkirin û zext didome, zozanên li Geverê hêj jî qedexene, gelek kes hene nikarin biçin gundên xwe û di navbera Gever û Wanê de bi dehan nokteyên leşkeran û polîsan hene. Ev yek gumanên gel mezintir dike.”
‘Gefxwarin û şer ti çareseriyê bi xwe re nayne’
Ercan Sevmez, da zanîn ku gel azadiya mûtlaq ya Rêberê Gelê Kurd Abdullah Ocalan dixwaze û bi domdarî wiha got: “Gel û taybetî jî dayikên aştiyê dixwaze bi Birêz Ocalan re hevdîtinê bikin. Aştî di şert û mercên hevpar de tên kirin û bi berdewamkirina dîl girtina Birêz Ocalan aştiyeke mayînde pêk nayê. Her wiha gumaneke gel jî Rojavayê Kurdistanê ye. Wezîrên Tirkiyeyê her şev li ser televîzyonan gefan li gelê Rojava dixin û ev yek çareseriyê bi xwe re nayne. Heke çareserî bê axaftin divê di siyaseta te de jî guhertinek hebe. Gefxwarin û şer ti çareseriyê bi xwe re nayne û gelê Kurd jî vê siyasetê pir nêz ve dişopîne û haydar e.”
‘Beşdariya ciwanan zêde ye’
Ercan Sevmez, destnîşan kir ku eleqeya jin, dayik û ciwanan ya ji bo civînên gel gelek e û got: “Tiştê herî zêde bala me kişandî di van civînan de tevlibûna jin û ciwanan e. Nirxandin û gotinên wan yên derbarê pêvajoyê de hêja ne û amadene ku erka xwe ya ji bo pêşketina pêvajoya aştî û civaka demokratîk pêk bînin. Ciwan dixwazin pêşiya siyaseta demokratîk bê vekirin da ku gerilayên çekên xwe şewitandî bikaribin bên siyasetê bikin. Kêf û coşa ciwanan ber bi çav bû û hêvî û gumanên wan jî hene. Heta niha me 25 civîn pêkanîn û gel jî pir dixwaze zêdetir em civînên bi vî rengî li dar bixin.”
Ercan Sevmez, da zanîn ku wê ji bo aştiyê di 12ê mehê de li Geverê meşeke bi meşale li dar bixin û bang li hemû gelê Colemêrgê kir ku beşdarî meşê bibin.
