Bedlîs – Li Girtîgeha Tîpa T a Xelatê gardiyanan êrîşî girtiyan kirin û îşkence li wan kirin. Hate zanîn ku 8 girtî birîndar bûne.
Li Girtîgeha Tîpa T a Xelatê ya Bedlîsê gardiyanan êrîşî girtiyan kirin. Hate zanîn ku ji girtiyan 8 kes birîndar bûne. Li gorî agahiyên hatine bidestxistin; di 22yê Tîrmehê de saet di 09.00’an de di dema jimartina sibehê de gardiyan çûne qawişa girtiyan û tiştên wan belav kirine. Li ser bertek nîşandana girtiyan gardiyanan îşkence li girtiyan kiriye.
Hate zanîn ku piştî êrîşê gardiyanan cihên girtiyan bi kêran dirandine û zirar dane tiştên wan. Hate ragihandin nêzîkî sêmehan beriya niha jî heman bûyer qewimiye. Hate diyar kirin ku laşên girtiyên îşkence li wan hatine kirin reş û şîn bûne û werimîne. Her wiha hate ragihandin ku girtiyên piştî îşkenceyê sewqî nexweşxaneyê hatine kirin jî ji ber ferzkirina mûayeneya bikelemçe bêyî ku bên dermankirin bi paş ve anîne girtîgehê.
Malbatên girtiyan bang li baro, rêxistinên hiqûqî û parlamenteran kirin ku seredana girtîgehê bikin.
