Li navçeya Hezo ya Êlihê pîrozbahiya Newrozê hat lidarxistin. Parlamenter Zeynep Oduncu di pîrozbahiyê de axivî û got ku ev Newroza azadiyê ye û dixwazin êdî ne komkujî azadiya gelê Kurd pêk were.
Li navçeya Hezo ya Êlihê, li qada li hemberî Kolana Amedê hat pîrozkirin. Welatiyên ku bi cil û bergên xwe yên neteweyî û bi xavikên kesk, zer û sor beşdarî pîrozbahiyê bûn, rêxistinên bajar û navçeyan ên Partiya Herêman a Demokratîk (DBP) û Partiya Wekhevî û Demokrasiyê ya Gelan (DEM Partî), Parlamentera DEM Partiyê ya Êlihê Zeynep Odûncû û Hevşaredarê Êlihê Yeşil Işik ê ku li cihê wî qeyûm hatibû tayînkirin amade bûn. Di pîrozbahiya ku ciwan û jin lê zêdetir bûn de ciwanan pankarta bi navê “Oxlim bavê we nikaribû” hat vekirin. Girseyê demeke dirêj bi coş govend gerand.
‘Mifteya aştiyê di destê birêz Ocaland ye’
Hevseroka DEM Partiya Êlihê Songul Korkmaz di pîrozbahiyê de axivî û wiha got: “Divê em li pişt peyama birêz Ocalan bin û vê peyamê biparêzin. Weke jin divê em peyama birêz Ocalan li mal bi mal vebêjin. Em dizanin ku birêz Ocalan mifteya aştiyê û mifteya çareseriyê bi awayekî zelal raxistiye ber çavan.”
Banga yekitiyê kir
Zeynep Odûncû diyar kir ku gelê Kurd ev sedsal e ji bo jiyaneke bi rûmet dixebite û wiha got: “Em banga yekîtiyê dikin. Birêz Abdullah Ocalan dibêje, ‘Em azadiyê dixwazin , şer naxwazin’. Rêya çareseriyê vebû û em ji bo çareseriyê dengê azadiyê bilind dikin.”
Odûncû destnîşan kir ku dewlet êrişên xwe didomîne û wiha got: “Vî şerî bisekinînin, bila komkujî nebe, bila li Tirkiyeyê li 4 parçeyên Kurdistanê aştî û yekitî pêk were. Ji ber vê yekê me navê azadiyê li Newroza 2025an kir. Em azadiyê dixwazin. Ji ber vê yekê divê her kes guh bide dengê ku ji Îmraliyê tê.”
Piştî axaftinan agirê Newrozê hat pêxistin û pîrozbahî bi gerandina govendê bi dawî bû.
