Rêxistina DEM Partiyê ya Îzmirê û TJA bi boneya 77emîn rojbûna Rêberê Gelê Kurd Abdullah Ocalan şahiyek li dar xist.
Tevgera Jinên Azad (TJA) û DEM Partiyê ya Îzmirê, bi boneya 77emîn rojbûna Rêberê Gelê Kurd Abdullah Ocalan şahiyek li dar xist. Di şahiya ku li Saloneke li Îzmîrê hatiye lidarxistin de, posterê Rêberê Gelê Kurd Abdullah Ocalan hat daliqandin. Di dema şahiyê de gelek caran dirûşmên “Bijî Serok Apo” û “Rojbûna te pîroz be ey Serok Apo” hatin berzkirin. Li gel Dayikên Aşitiyê, saziyên demokratîk ên li Îzmirê û gelek welatî beşdarî şahiyê bûn.
Şahî bi deqîqeyek rêzgirtinê ya ji bo bîranîna kesên ku di têkoşîna azadiyê de jiyana xwe ji dest dane dest pê kir. Piştre sînevîzyona ku hatibû amadekirin hat nîşandan.
‘4ê Nîsanê vejîna gelê Kurd e’
Endamê Koma Aşitiyê Mehmet Şîrîn Tunç di şahiyê de axivî û diyar kir ku 4ê Nîsanê ji bo gelê Kurd rojeke dîrokî ye. Tunç destnîşan kir ku ev roj vejîna gelê Kurd e, divê 4ê Nîsanê bi awayekî xurt bê pêşwazîkirin û got: “Îro di şexsê Rêberê Gelê Kurd de hemû gelê Kurd bûye qehreman û navê xwe di dîrokê de nivîsand. Hebûna gelê Kurd îro li hemû cîhanê hat naskirin. Demekê Gelê Kurd li Kurdistanê nedikariya bêje ‘Ez Kurd im, welatê min Kurdistan e’. Lê belê vejîna 4’ê Nîsanê, di şexsê Rêberê Gelê Kurd de vejîneke nû pêk anî.”
‘Divê em Serokatiyê bijîn û bidin jiyîn’
Mehmet Şîrîn Tunç diyar kir ku heke ew Serokatiyê nejîn û nedin jiyîn, ew ê berpirsyariya xwe ya li hemberî dîrokê bi cih neynin û got: “Ev vejîn, ji vejîna gelekî zêdetir, vejîna mirovahiyê ye. Divê em vê wekî vejîna hemû jinên cîhanê ya di şexsê jinên Kurd de bibînin û li gorî wê tevbigerin. Taybetmendiyeke wiha ya 4ê Nîsanê heye. Ji ber vê mezinahiya Rêberê Gelê Kurd, hemû cîhanê û bi taybetî hêzên serdest, Rêbertiya Gelê Kurd wekî dijminê herî mezin îlan kirin. Lê belê li Girava Îmraliyê, di nav hawirdoreke 6 metrekare de asoyeke nû vebû. Bi vê asoyê re ne tenê gelê Kurd, hemû Rojhilata Navîn û pêşketina mirovahiya cîhanê girt nava xwe. Mezinahiya Serokatiyê hinekî jî li vir e. Ji ber wê divê em Serokatiyê bijîn û bidin jiyîn.”
Piştî axaftinan hunermend Rojkar derket ser dikê.
Şahî bi gerandina govend û berzkirina dirûşman bi dawî bû.
