Parlamentera DEM Partiyê Sumeyye Boz di Newroza Kopê de axivî, bal kişand ser giringiya Newroza îsal û got: “Hebûna Kurdan hat naskirin, niha dema azadiya Kurdan û Rêberê Gelê Kurd e.”
Li navçeya Kopê ya Mûşê bi şîara “Azadî û Yekitiya Demokratîk” Newroz hate pîrozkirin. Di Newrozê de ku li Qada Otogarê hat lidarxistin, dirûşmên “Bijî Serok Apo” û “Jin, jiyan, azadî” hatin berzkirin. Jin û ciwanên ku bi cil û bergên herêmî û kesk, sor û zer beşdarî Newrozê bûn, tevî barîna berfê jî gel beşdarî pîrozbahiyê û li ber stranan govend gerandin. Di pîrozbahiyê de parlamenterên DEM Partiyê yên Mûşê Sumeyye Boz û Sezaî Temellî û gelek welatî amade bûn.
‘Dema azadiya Rêberê Gelê Kurd e’
Parlamenter Sumeyye Boz bibîranîna endamê Konseya Hevserokatiyê yê PYDê Salih Muslim ku çend roj berê jiyana xwe ji dest dabû, dest bi axaftina xwe kir. Sumeyye Boz anî ziman ku ev Newroz Newroza azadiyê ye û got: “Berxwedana li Rojava nîşan da ku li dijî kesên bedena jinê dikin hedef, jinan bi yekîtiyê bersiv daye. Hebûna Kurdan hat naskirin. Niha dema azadiya Kurdan û Rêberê Gelê Kurd e. Newroz ji bo me berxwedan e. Gelê ku qada Newrozê tije kiriye, bersivê dide kesên ku dixwazin ruhê berxwedanê yê Newrozê tune bikin. Yek ji wan kesên ku ji bo Newrozê bedena xwe da ber agir û li ber xwe da, ji vî axê bû; Evrim Demir bû. Bi vî ruhî berxwedan hîn jî berdewam dike.”
‘Divê gavên hiqûqî bên avêtin’
Sumeyye Boz axaftina wiha berdewam kir: “Têkoşîna me ya ji bo civakeke demokratîk hîn jî berdewam dike. Ev Newroz ji Newrozên din cuda ye; banga ku di 27ê Sibatê de ji Îmraliyê hat kirin, ji aliyê gelê Kurd ve hat xwedîderketin. Ev bang ji bo hemû gelan aştî û civaka demokratîk pêşniyar dike. Çar parçe bûn yek û gotin em ji bo avakirina civaka demokratîk amade ne. Civaka demokratîk wê azadiya fîzîkî ya gelê Kurd û Rêberê Gelê Kurd jî dabîn bike. Divê di zûtirîn dem de azadiya fîzîkî ya Abdullah Ocalan bê mîsogerkirin. Tenê gotin têrê nake, divê gavên hiqûqî jî bên avêtin. Heya ku ev pêk neyên em ê dest ji têkoşîna xwe bernedin. Em ê agirê Newrozê ji bo azadî û civaka demokratîk geş bikin.”
Piştî axaftinê agirê Newrozê ji aliyê Dayikên Aştiyê, parlamenteran û gel ve bi coşeke mezin hat vêxistin. Piştî vêxistina agir, welatiyan tevî barîna berfê jî li ber stranên Koma Rengîn govend gerandin û pîrozbahî bi dawî bû.
