Li Eyaleta Hayber Pahtunhva ya li bakurê rojavayê Pakistanê, du êrîşên bi bombeyî çêbûn û bi hêzên ewlehiyê re şer qewimî. Di êriş û teqînan de herî kêm 14 kesan jiyana xwe ji dest da û 27 kes jî birîndar bûn.
Li Eyaleta Hayber Pahtunhva du êrîşên bi bombeyî li dijî hêzên ewlehiyê pêk hatin. Piştî teqînan di navbera komek çekdar û hêzên ewlehiyê yên Pakistanê de pevçûn derket. Di encama şer de herî kêm 14 kesan jiyana xwe ji dest dan, zêdeyî 27 kes birîndar bûn. Di nava miriyan de 11 wezîfedarên ewlehiyê û 3 sivîl jî hene. Her wiha 3 kesên çekdar jî jiyana xwe ji dest da.
Wesayîta tijî teqemenî hate teqandin
Li gorî rayedaran êrîşa ewil li navçeya Bajaur pêk hat. Wesayîteke bi teqemeniyan barkirî, li dîwarê medreseyekê ket û înfîlak bû. Di teqînê de 8 polîs û endamên Yekîneyên Sînor jiyana xwe ji dest dan, 10 wezîfedarên ewlehiyê jî birîndar bûn. Bi bandora teqînê re banê hin malên li derdor hilweşiyan û zarokekî jiyana xwe ji dest da. Rayedaran diyar kir ku dibe windahiya can zêde bibe. Êrîşeke cuda jî li bajarê Bannu pêk hat. Li nêzî nuqteyeke polîsan teqîn çêbû. Di bûyerê de 2 sivîl mirin, 17 kes birîndar bûn.
Berê jî çalakî pêk hatibûn
Li navçeya Shangla jî di navbera hêzên ewlehiyê û çekdaran de şer qewimî, 3 polîs û 3 çekdaran jiyana xwe ji dest dan. Polîsên eyaletê ragihandin ku kesên hatine kuştin, berê tevlî êrîşên li dijî welatiyên Çînê bûne. Çîn di salên dawî de bi milyaran dolar li Pakistanê dirazîne, ev proje dem bi dem dibin hedefa komên çekdar. Di Adara 2025an de ji ber êrîşeke xwekujiyê 5 endezyar û ajokarên Çînî yên ku di înşaeta bendavekî de dixebitîn, jiyana xwe ji dest dabûn.
Heta niha tu koman berpirsyariya çalakiyê negirtiye ser xwe û ji saziyên fermî yên Pakistanê jî tu daxuyanî nehatine dayîn.
