MÎA-FEDê ji bo balê bikişîne dorpêça li ser Kobanê li Qada Cumhuriyetê ya navçeya Pirsûsê nimêja Înê kir.
Bi pêşengiya Federasyona Lêkolînên Îslamî ya Mezopotamyayê (MÎA-FED) li dijî krîza mirovî û dorpêça li ser Kobanê li Qada Cumhuriyetê ya navçeya Pirsûsê ya Rihayê nimêja Înê kir. Gelek endamên MÎA-FEDê û welatî tev li nimêjê bûn. Pêşiya nimêjê Hevserokê MÎA-FEDê mele Abdullah Sagir, weaz da civatê.
‘Bêdengî şirîkatiya sûc e’
Mele Abdullah di weazan de bal kişand dorpêça li ser Kobanê û got ku kesên li dijî zilmê bêdeng be ew jî şirîkê sûc û zilmê ye. Mele Abdullah destnîşan kir ku divê tavilê Deriyê Murşîtpinarê bê vekirin û hedîsên Hz. Muhemmed ên li dijî zilmê xwend.
Piştî weazan nimêj hate kirin û daxuyanî hate dayîn.
‘Li ber zilmê rabin’
Mele Abdullah Sagir di daxuyaniyê de wiha got: “Ev banga me ye ji bo hikûmetên Tirkiye û Sûriyeyê; deriyê sînor vekin. Ger li wir mirov ji ber tîbûn û birçîbûnê bimirin hûn şirîkê wê qetlîamê ne. Tavilê derî vekirin. Gelê me li her derê aştiyê dixwaze. Hatine pêxemberan jî ji bo vê yekê ye. Pêxember ji bo li dijî zilmê derkevin hatine. Ev banga me ye ji bo cîhanê. Li dijî zilmê bêdeng nemînin.”
Piştî daxuyaniyê meleyan serdana Rêxistina DEM Partiyê ya Pirsûsê kir.
