Haşdî Şabî ragihand ku li navçeya Qaîmê ya parêzgeha Enbarê, li dijî baregeha Lîwaya 45an êrîşeke hewayî pêk hatiye. Di encama êrîşê de 6 kes hatin kuştin û 4 kes jî birîndar bûn.
Li gorî daxuyaniya fermî ya Haşdî Şabî, berbanga sibê, li navçeya Qaîmê ya ser bi parêzgeha Enbarê ve, baregeha Lîwaya 45an rastî êrîşeke hewayî hat. Haşdî Şabî di daxuyaniya xwe de Amerîka û Îsraîl wekî berpirsên vê êrîşê nîşan da. Hat diyarkirin ku di encama bombebaranê de 6 endamên Haşdî Şabî jiyana xwe ji dest dane ku di nav wan de kesên di bin banê Wezareta Parastinê ya Iraqê de kar dikirin jî hene. Her wiha di êrîşê de 4 endamên din jî birîndar bûne û ji bo dermankirinê hatine sewqkirin.
Êrîşên li ser sînor zêde dibin
Navçeya Qaîmê ya ku li ser sînorê Iraq û Sûriyeyê ye, di demên dawî de gelek caran dibe qada êrîşên bi vî rengî. Tevî ku Haşdî Şabî îşaret bi Amerîka û Îsraîlê dike jî, heta niha ji aliyê van her du welatan ve derbarê êrîşê de tu daxuyaniyeke fermî nehatiye dayîn.
