Li gelek bajarên Rojavayê Kurdistanê bi armanca bîranîna qurbaniyên komkujiya Helebceyê daxuyanî hatin dayîn û ji bo cardin komkujî pêk neyên banga yekîtiya demokratîk a gelê Kurd hate kirin.
Bi boneya 38emîn salvegera komkujiya Helebceyê, li Qamişlo, Hesekê, Çilaxa, Girkê Legê, Dêrik, Amûdê, Dirbesiyê, Til Temir û Kobaniyê daxuyanî hatin dayîn. Di daxuyaniyan de qurbaniyên komkujiyê hatin bîranîn û berpirsên komkujiyê bi tundî hatin şermezarkirin.
Qamişlo
Meclisa Malbatên Şehîdan a Qamişloyê bi boneya salvegera komkujiya Helebceyê daxuyaniyek da. Daxuyanî li Qada Şehîdan bi zimanê Kurdî ji aliyê endama Meclisê Lîloz Xelîl ve û bi zimanê Erebî ji aliyê Hevserokê Meclisê Ubeyd Etê ve hate xwendin. Di daxuyaniyê de hat bibîrxistin ku Komkujiya Helebceyê yek ji sûcên herî qirêjî yên dîroka pergalên dîktatoran e. Hate diyarkirin ku ev komkujî di çarçoveya siyasetên bi armanca qirkirina gelê Kurd de pêk hatiye.
‘Gelê Kurd dê têkoşîna azadî û rûmetê bidomîne’
Di daxuyaniyê de komkujiyên li çar perçeyên Kurdistanê pêk hatîn wekî berdewama komkujiya Helepceyê hatin pênasekirin û hate daxuyandin ku hemû komplo berdewama hedefkirina hebûna gelê Kurd in. Di daxuyaniyê de bang li civata navneteweyî hate kirin ku hesab ji berpirsên qirkirinên etnîkî bipirsin û edaletê pêk bînin. He wiha hate gotin ku dê gelê Kurd li gorî qanûnên navneteweyî û mafên mirovan têkoşîna rewa ya bidestxistina azadî û rûmetê bidomîne.
Tirbespiyê
Meclisa Bajarê Tirbespiyê jî piştî deqeya rêzgirtinê, daxuyaniyek li pêşiya avahiya xwe da. Ji rêveberên Meclisê Ebdulezîz Abdullah daxuyanî xwend. Di daxuyaniyê de Komkujiya Helebceyê hat şermezarkirin û qurbaniyên wê hatin bibîranîn. Hate diyarkirin ku ev komkujî yek ji sûcên herî mezin a dîroka nûjen e û berdewama sûcên li dijî gelê Kurd e. Di daxuyaniyê de bêdengiya navneteweyî ya li hemberî komkujiyên li dijî Kurdan hat rexnekirin. Her wiha êrişên salên dawîn ên bi çekên kîmyewî yên dewleta Tirk ên li dijî gerîlayan hat şermezarkirin. Banga hesabpirsînê ji berpirsên bikaranîna çekên kîmyewî hat kirin.
Di dawiya daxuyaniyê de meclisê dilsoziya xwe bi şehîdan re, bi taybet şehîdên Komkujiya Helebceyê re anî ziman û soza domandina parastina nirxên azadî, rûmet û edaletê da.
Hesekê
Li bajarên Hesekê, Til Temir û Dirbêsiyê jî, endamên saziyên civaka sivîl, nûnerên partiyên siyasî û rûspiyan, gel daket qadan. Gel ji bo bîranîna şehîdên Komkujiya Helebceyê 5 deq rêz girtin û daxuyanî hatin dayîn. Di daxuyaniyan de hat bibîrxistin ku 16’ê Adara 1988’an bi fermana Elî Hesen El Mecîd (Elî Kîmyewî) komkujiyeke herî mezin li Helebceyê hat kirin. Hate diyarkirin ku komkujiya Helebceyê dîrokeke bi êş di nava civaka Kurd de ye û di wijdanê Kurdan de bi navê “Adara Reş” tê naskirin. Di daxuyaniyê de komkujî bi tundî hat şermezarkirin û ji bo bidestxistina mafên rewa banga domandina têkoşînê li gelê Kurd hat kirin.
