Li Şemzînanê bi hezaran welatî bi cil û bergên neteweyî herikîn qada Newrozê. Oznûr Bartinê bal kişand ser pêvajoya Aştî û Civaka Demokratîk û got: “Di Newrozê de bi milyonan kes ji bo aştî û cavaka demokratîk derket qadan.”
Newroza 2026an a bi şîara “Azadî û Yekitiya Demokratîk” li navçeya Şemzînanê ya Colemêrgê bi tevlêbûna bi hezaran hat pîrozkirin. Gelê Şamzînanê bi kiras û fistanên xwe, bi şal û şepikên xwe qada Newrozê xemiland. Li qada Newrozê pankarta “Newroza Azadî û Yekitiya Demokratîk” hat daliqandin. Di pîrozbahiyê de parlamenterên Colemêrgê yên DEM Partiyê Oznûr Bartin û Vezîr Coşkun Parlak, rêveberên partiyên siyasî, saziyên civakî, Dayikên Aştiyê û bi hezaran welatî amade bûn. Di qada Newrozê de posterê Rêberê Gelê Kurd Abdullah Ocalan hat vekirin û her tim dirûşmên “Bijî Serok Apo” hatin berzkirin.
‘Bi milyanan kes ji bo aştî û cavaka demokratîk derket qadan’
Parlamentera DEM Partiyê ya Colemêrgê Oznûr Bartin di pîrozbahiyê de bal kişand ser pêvajoya Aştî û Civaka Demokratî ku di 27ê Sibata 2025an de ji aliyê Rêberê Gelê Kurd Abdullah Ocalan ve hatibû destpêkirin û got: “Hûn jî dizanin, ji 27ê Sibatê ve ji salekî zêdetir e pêvajoya Aştî û Civaka Demokratîk destpê kiriye. Gelê Kurd di vê pêvajoyê de gelek gavên girîng avêtin. Lê mixabin dewletê hê gavên pêwist neavêtine. Em li vir bang dikin; hûn li benda çi ne? Çima hûn mafên gelê Kurd bi cih nayînin? Divê hûn li vê qadê binerin, li tevahiya Kurdistanê binerin. Du mîlyon kedkar, gelê Kurd, welatparêz û dostên welatparêzan, dostên Kurdan derketin qadan. Çima? Ji bo piştgiriya aştiyê, ji bo piştgiriya civaka demokratîk. Em rojbûna Rêberê gelê Kurd, rênîşanderê rêberan birêz Abdullah Ocalan pîroz dikin û dibêjin: ‘Azadiya te azadiya me ye, paşêroja me tû yî.’ Dîsa em dibêjin, Newroza te pîroz be.”
Piştre rêveberê DEM Partiyê yê navçeya Şemzînanê Fahîr Geylanî peyama Rêberê Gelê Kurd Abdullah Ocalan a ku jî bo Newroza Amedê şandibû, xwend. Gel piştî xwendina nameyê dirûşma “Bijî Serok Apo” berz kir.
Piştî axaftinan agirê Newrozê hat pêxistin û hunermendan stranên xwe stirîn. Gel li dor agirê Newrozê govend gerand û piştre pîrozbahî bi dawî bû.
