Şirnex – Li navçeya Silopiyayê li dijî astengkirina şandeya ku malbatên rojnameger Cîhan Bîlgîn û Nazim Daştan jî di nav de li Deriyê Sînor ê Xabûrê çalakiya meşê hat li darxistin. Parlamenterê DEM Partiyê Kamûran Tanhan ku di daxuyaniyê de axivî destnîşan kir ku heta ew cenazeyan wergirin dê têkoşîna xwe bidomînin.
Şandeya ku malbatên rojnameger Cîhan Bîlgîn û Nazim Daştan jî di nav de û ji Parlamenterê Partiya Wekhevî û Demokrasiyê ya Gelan (DEM Parti) yê Mêrdînê Kamûran Tanhan, endamên OHDê, MEBYA-DERê û DFGê pêk tê ji bo cenazeyê rojnamevan Nazim Daştan û Cîhan Bîlgîn ên bi êrişa SÎHAyê ya dewleta tirk hatin qetilkirin werbigirin xwestin derbasî Herêma Kurdistana Federe bibin. Lê şandê bi hincetên cuda 3 rojan li deriyê sînorê Xabûrê hate sekinandin. Piştî 3 rojan şandê ji deriyê sînor vegeriya.
Şande li dijî sekinandina wan a li Deriyê Sînor ê Xabûrê li navçeya Silopiyayê ya Şirnexê daxuyanî da. Komeleya Rojnamegeran a Dicle Firatê (DFG), rêxistinên Partiya Herêmên Demokratîk (DBP) û DEM Partî yên Şirnexê, Tevgera Jinên Azad (TJA), Meclîsa Dayikên Aştiyê, parlamentera DEM Partiyê ya Şirnexê Newroz Ûysal Aslan û gelek kes tev li daxuyaniyê bûn. Di daxuyaniyê de pankarta ku wêneyên rojnameger Cîhan Bîlgîn û Nazim Daştan jî li ser bûn û li ser “Çapemeniya Azad nayê bêdeng kirin” dinivîsî hilgirtin. Girse ji Kolana Hunerê ya Silopiyayê heta ber avahiya DEM Partiyê ya navçeyê bi diruşmên, “Şehîd namirin”, “Nazim Cîhan rûmeta me ne”, “Çapemeniya Azad nayê bêdengkirin”, “Rojava rûmet e, rûmeta gelê Kurd e”, “Jin jiyan azadî” heta ber deriyê avahiya DEM Partiyê ya Navçeya Silopiyayê meşiya. Li ber deriyê avahiya navçeyê daxuyanî hat dayin.
‘Em pênûs û lênûska wan erdê nahelin’
Di destpêkê de Hevserokê DFGê Selman Çiçek axivî. Selman Çiçek ku bal kişand ser astengkirina şandeyê ya li Dêriyê Sînor ê Xabûrê, bi lêv kir ku bi wê pêkanînê îşkence li cenazeyan hatiyê kirin û wiha got: “Şande bi awayekî keyfî hat asteng kirin. Hinceta sîstem tune ye nîşan didin lê dema mijar Kurd be sîstem tune ye. Weke ku Cîhan û Nazim dev ji têkoşîna ragihandina heqîqetê bernedan em jî dev jê bernadin. Li Rojava qirkirinek heye. Hevalên me ji ber ku ew qirkirin nivisandin hatin hedef girtin û qetil kirin. Em soz didin hevalên xwe ku em ê têkoşîna wan bilind bikin. Em pênûs û lênûska wan erdê nahelin. Em dibêjin çapemeniya azad civaka azad e.”
‘Ji bo cenazeyên wan bînin û teslîmî malbatan bikin çi ji destê me were em ê bikin’
Pişt re jî Kamûran Tanhan axivî. Kamûran Tanhan jî anî ziman ku ew bi awayekî keyfî li deriyê sînor hatinê sekinandin û got ku heta ew cenazeyên rojnamegeran wernegirin dê têbikoşin. Kamûran Tanhan wiha dirêjî da axaftina xwe: “Em li Deriyê Sînor ê Xabûrê 3 rojan dan sekinandin. Hemû pîvanên mirovahiyê li wir hatin binpêkirin. Digotin sistema me xirab bûye lê em dizanin a ku xirab bûye ne ew sîstem e wijdan û hiqûqa wan xirab bûye. Bi hincetên cuda cuda astengiyan derdixînin. Heke bixwesta wê cenaze li deriyê Qamişloyê teslîmî malbatan bikira. Definkirina cenaze mafeki xwezayî ye. Lê ew maf tê astengkirin. Dewleta ku dibêje ez bi hêz im li Xabûrê hilweşiya bû. Nêhiştin em derbasî Başûr bibin. Ji çi ditirsiyan û çi vêdişerin? Hûn li Rojava çi dikin. Wan rojnamegeran çi kişandibûn ku hûn tirsiyan. Em dizanin hûn ji çi ditirsin. Hûn qirkirina gelê Kurd tirsiyan. Em jî li vir dibêjin em ê têkoşîna wan bilind bikin. Ji bo cenazeyên wan binin û teslîmî malbatan bikin çi ji destê me were em ê bikin. Pekanînên li Xabûrê hatin kirin ne exlaqî, ne wijdanî û ne jî hiqûqî bûn. Gotin em ê we derbas bikin lê ji soza xwe vegeriyan. Lê bila bizanin Em jî mafê xwe yê heq bi paş ve gav naavejin. Bila li dîrokê binêrin Kurd kî ne. Bila dîroka Çapemeniya Azad binêrin.”
Daxuyanî bi çepik û dirûşmeyan bi dawî bû.
