Bi pêşengiya endamên DBPê yên jin û aktîvîstên TJAyê atolyeya ‘Bîrdoziya Rizgariya Jinê’ hat lidarxistin.
Li taxa Emerkoy a Şirnexê bi pêşengiya endamên DBPê yên jin û aktîvîstên TJAyê bi mijara, ‘Bîrdoziya Rizgariya Jinê’ atolye hat lidarxistin. Parlementera Şirnexê Newroz Ûysal Aslan, Berdevka Meclîsa Jinê ya DBPê Berîvan Bahçecî û gelek jin tevî atolyeyê bûn.
Di destpêka atolyeyê de Berdevka Meclîsa Jinê ya DBPê Berîvan Bahçecîyê bal kişand ser hewcedariya pêkanîna atolyeyê û wiha axivî; “Tevgera Azadiya Kurdan ji bo hebûna Kurdan derket holê. Beriya vê yekê Kurd di bin betonê de bûn. Gelê kurd qatekî di bin betonê de be, jinên Kurd heft qatan di bin betonê de bûn. Ger îro gelê Kurd hatibe asta hebûnê di vê hebûnê de rola herî girîng a jinên Kurd e.”
Parlementera DEM Partiyê Newroz Ûysal Aslanê jî çekîmhakirina endamên HPG û YJA-Starê ya di 11ê mehê de pêk hatî bi bîr xist û ev tişt anîn ziman; “ Îro pêvajoyek hatiye destpêkirin û her gavek a vê pêvajoyê girîng e. Di 11ê mehê de gaveke gelek girîng hate avêtin û di avêtina vê gavê de jinên Kurd li pêş bûn. Ev jî nîşanî me dide ku di hatina vê astê de rola jinên Kurd çiqas girîng e.”
Piştî axaftina Ûysalê, niqaş û axaftin li ser mijara atolyeyê hatin kirin û atolye bi dawî bû.
