“Civînên Aştî û Civaka Demokratîk” ku bi pêşengiya TJA, DBP û DEM Partî hatibûn destpêkirin li Şirnex û navçeyên wê bênavber didomin. Welatiyên Şirnexê eleqeyek mezin didin civînan û bi girseyî tevlî dibin.
Bi pêşengiya Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) ku “Civînên Aştî û Civaka Demokratîk li bajarên bakurê Kurdistanê û Tirkiyeyê hatibûn destpêkirin li Şirnex û navçeyên wê tax bi tax, gund bi gund berdewam dikin.
Cizîr
Li navçeya Cizîrê gundê Hoser û taxa Misûriyê civîna gel hat li darxistin. Li taxa Misuriyê gelek welatî tevlî civînê bûn. Civîn ji bo cangoriyên azadî û demokrasiye bi deqîqeyeke rêzgirtinê destpê kir. Piştî rêzgirtinê daxuyaniya Rêberê Gelê Kurd Abdullah Ocalan a bidîmên û merasîma şewitandina çekan a komeke gerîlayên Civaka Aştî û Demokratîk hat temaşekirin. Piştrê jî nivîsa qala nêrînên Rêberê Gelê Kurd Abdullah Ocalan li ser pêvajoyê û avakirina Civaka Demokratîk dike hat xwendin. Piştî xwendina nivîsê welatiyên tevlî civînê bibûn pirs û nêrînên xwe anîn ziman.
Hezex û Şirnex
Li navenda Şirnexê jî bi tevlibûna parlamentera DEM Partî Newroz Uysal Aslan û gelek welatiyan civîna gel hat lidarxistin. Di civînan de li ser pêvajoyê nirxandin hatin kirin. Welatiyên tevlî civînê bibûn jî li ser pêvajoyê pirs û nêrînên xwe yên li ser pêvajoyê anîn ziman. Civîn bi nirxandinên Newroz Uysal Aslan li ser pêvajoyê bi dawî bû. Li gundê Xirabê Sosina yê Hezexê jî di çerçoveya civînan de aktivîstên TJA, endamên DBP û DEM Partî bi gel re hatin cem hev û li ser pêvajoyê nirxandin kirin. Welatiyên gund jî li ser pêvajoyê pirsên meraq dikirin pirsîn û nêrînên xwe vegotin.
