Li Wan û Îzmîrê bi hezaran kes ji bo 1ê îlonê Roja Aştiyê ya Cîhanê meşiyan. Siyasetmedar Sebahat Tûncel ku di meşa 1ê Îlonê ya Wanê de axivî, bal kişand ser erka dewletê ya di pêvajoya aştiyê de û got: “Birêz Ocalan ev derî vekir, lê ji bo ev derî neyê girtin dewlet jî erka xwe bi cih bîne.”
Platforma Ked û Demokrasiyê ya Wanê, bi tevlibûna hezaran kesan bi boneya 1ê Îlonê Roja Aştiyê ya Cîhanê meşek li dar xist. Meş li Çerxerêya Sebze Haliyê heta Parka Mûsa Anter berdewam kir û pankartên “Ji bo civaka demokratîk deng bide aştiyê”, “Jiyanek ku tekoşîna wê nehatiye dayîn bêwate ye” û “Statuya kurdî, perwerdehiya bi kurdî” hatin hilgirtin. Di meşê de dirûşmeyên “Bijî berxwedana zîndanan”, “bijî berxwedana Rojava”, “jin jiyan azadî” û “Bijî aştî” hatin berzkirin. Siyasetmedara kurd û aktivîsta Tevgera Jinên Azad (TJA) Sebahat Tûncel, hevşaredarên Bajarê Mezin ên Wanê Neslîhan Şedal û Abdullah Zeydan, Serokê Baroya Wanê Sînan Ozaraz, hevserokên DBP û DEM Partiyê yên Wanê, hevşaredarên navçeyan û parlementerên DEM Partiyê yên Wanê, Meclîsa Dayikên Aştiyê, Meclîsa Ciwanan a DEM Partiyê û nûnerên saziyên sivîl tev li meşê bûn.
Ciwanan di meşê de posterê Rêberê Gelê Kurd Abdullah Ocalan vekirin û bi dirûşmeyên “Silav silav ji îmraliyê re hezar silav” û “Bijî Serok Apo” meşiyan.
‘Bi zext û zoriyê nabe’
Siyasetmedar Sebahat Tûncel piştî meşê axivî û bal kişand ser erka dewletê ya di pêvajoya aştiyê de. Sebahat Tûncel, anî ziman ku ev pêvajoya nû hêvî û deriyeke nû ye û got: “Birêz Ocalan ev derî vekir, lê ji bo ev derî neyê girtin dewlet jî erka xwe bi cih bîne. Divê dewlet bi hemû saziyên xwe ve bigihije perspektîfa aştiyê. Em aştiyê dixwazin, lê hûn ji dîsa jî mudaxaleyê dikin. Ez bang li Wezareta Karên Navxweyî dikim, gelê dê ev kar çawa çêbe? Heke dewlet û Tifaqa Cûmhûr di vê pêvajoyê de bi biryar bin, divê erka xwe jî bi cih bîne. Bi zext û zoriyê nabe, bi zimanê berê nabe. Aştî mafeke bingehîn e û dewlet jî erkdar e ku vî mafî pêk bîne.”
‘Divê TMK bê rakirin’
Sebahat Tûncel, bal kişand ser peyama Rêberê Gelê Kurd Abdullah Ocalan a 1ê Îlonê û axaftina xwe wiha bi dawî kir: “Birêz Ocalan di peyama xwe de jî tîne ziman ku ev ne tenê ji bo kurd û tirkan, ji bo Rojhilata Navîn jî derfeteke mezin e. Em weke kurd hewl didin bi Tirkiyeyê re di bingeha aştî û demokrasiyê de hiqûqeke nû ava bikin, lewma divê dewlet jî li gel kurdan hiqûqeke nû ava bike. Divê ev komîsyona li meclîsê hatiye avakirin, bi Birêz Ocalan re hevdîtinê bike, divê gavên hiqûqî bên avêtin. Divê qanûna bi terorê re tekoşîn (TMK) bê rakirin, ji ber ku ev qanûn li hember azadiyê astengiyê çêdike. Divê pêşiya siyaseta demokratîk bê vekirin, siyasetmedarên li zindanan bên berdan.”
Piştî axaftina Sebahat Tûncel, çalakî bi dawî bû.
Îzmîr
Hêzên Ked, Aştî û Demokrasiyê ya li Îzmîrê bi boneya 1ê Îlonê Roja Aştiyê ya Cihanê mîtingekê li dar xist. Girseya ku li qada Cumhuriyetê civiya ber bi qada Gundogduyê ve bi dirûşim û stranan meşiyan. Di mitîngê de li ser girîngiya aştiyê û pêvajoya ku ji hêla Rêberê Gelê Kurd Abdullah ocalan hatiye destpêkirin axaftin hatin kirin û banga x3ddîderketina li pêvajoyê kirin.
Mitîng bi berzkirina dirûşmeyan bi dawî bû.
