Rêxistina TJA, DBP û DEM Partiyê dê li Wanê di 23ê Tebaxê de bi dirûşma ‘Azadî wê bi ser bikeve, ne tecrîd’ mîtîngê li dar bixin.
Rêxistina DBP, TJA û DEM Partiyê dê di 23ê tebaxê de mîtîngekê li dar bixe. Nûnerên saziyên civakî û rêxistinên demokratîk têkildarî mîtîngê li avahiya bajêr a DEM Partiyê civîneke çapemeniyê lidarxistin. Hevseroka DEM Partiyê ya Navçeya Rêya Armûşê Şevîn Polat bi Tirkî, Hevserokê DEM Partiyê yê Navçeya Artemêtanê Mazlûm Babûr jî bi Kurdî daxuyanî xwend.
Şevîn Polat anî ziman ku ji bo avakirina aştiyeke bi rûmet ew bi hemû sazî û gelê xwe amade ne û got: “Em ê mîtînga Aştî û Civaka Demokratîk lidar bixin. Bi pêşengiya TJA, DBP û DEM Partiyê em ê mîtîngê pêk bînin û bang li gelê xwe, rêxistinên girseyî yên demokratîk, partiyên siyasî, sendîka û saziyên alîgirê aştiyê dikin ku tevlî mîtîngê bibin.”
Hevseroka DBP’ê ya Wanê Gonul Ûzûnay jî anî ziman ku pirsgirêka Kurd bi polîtîkayên îmha û înkarê yên sed salî bêçareserî hatiye hiştin, Hevserokê DEM Partiyê yê Wanê Veysî Dîlekçî jî bal kişand ser girîngiya karên aştiyê.
Hevşaredarê Bajarê Mezin ê Wanê Abdullah Zeydan banga ‘Aştiya bi rûmet û jiyana azad’ a Rêber Apo ya 27’ê Sibatê bi bîr xist û got, “Gelê Wanê pêşengî ji aştiya bi rûmet û jiyana azad a bi rûmet re kiriye. Her tim em ê xwedî li vê aştî û têkoşînê derkevin.”
Mîtîng wê li Parka Aştiyê ya Mûsa Anter saet di 17:00 de destpê bike. Gultan Kişanak, Hevserokê DEM Partiyê Tûncer Bakirhan, Hevserokê DBP’ê Keskîn Bayindir wê li mîtîngê biaxivin. Her wiha hunermend Xecê û Aylîn Demîr jî wê hunera xwe pêşkêş bikin.
