Malbatên pêşeng û sazumankarên PKKê Alî Haydar Kaytan û Riza Altûn spasiya kesên tev li şîn, bîranîn û çalakiyan bûne kirin û gotin: “Tacîdarkirina bi azadiyê ya meşa mezin a wan daye destpêkirin, deynê stûyê me ye.”
PKKê 12emîn Kongreya xwe di navbera 5-7’ê Gulanê de li dar xist. Piştî kongreyê di 12ê Gulanê de encamnameya kongreyê ragihand. Aşkere kir ku kadroyên pêşeng ên partiyê Alî Haydar Kaytan û Riza Altûn jiyana xwe ji dest dane. Piştî daxuyaniyê, li gelek bajarên bakurê Kurdistanê û Tirkiyeyê ji bo Alî Haydar Kaytan û Riza Altûn şîn hatin danîn û çalakiyên bîranînê hatin lidarxistin.
Malbatên Alî Haydar Kaytan û Alî Riza Altûn, bi peyamekê spasiya kesên tev li şîn, bîranîn û çalakiyan bûne kirin. Li gorî nûçeya ANFê, peyama malbatan wiha ye:
“Di 12ê Gulana 2025an de ji me re hate ragihandin ku ji ferdên malbatên me hevrê Alî Haydar Kaytan û Riza Altûn şehîd bûne. Ev yek ne tenê ji bo me, her wiha ji bo her kesên ku şerê azadî û hebûna Kurdan dimeşînin, windahiyeke mezin bû. Li şûna bibin bira, kek û kurek, wan tercîh kirin ku bibin parçeyek ji civakîbûna li Kurdistanê ku her kêliya wê bi ked, xwîn, êş û hêviyê hatiye hûnandin, afirandin. Li şûna vegera li malbatên me, wan xwestin guhertinê bikin. Em jî kirin rêwiyên vê rêya xwe. Ji ber vê yekê êşa me, windahiya me kolektîf e. Bi navê malbatên wan, em navê wan bi serbilindî, bi rûmet radikin.
Wan mîrateyeke gelekî xurt û hêja ji me re hiştin. Baweriya ji bo paşerojeke azad a gelên Kurdistan û Rojhilata Navîn û her mirovên li dijî sîstemê têdikoşin. Ji bo vê baweriyê bi cih bînin, îradeyeke xurt afirandin. Wan ji me bêhtir temenê xwe bi hevrêyên xwe yên têkoşînê û civaka ku pêşengî jê re kirin, bihurandin. Lewma bi hevrê û civaka xwe re hîn bêhtir bîranînên wan hene. Li her mala ku li deriyê wê xist, li her cihê ku tasek av jê vexwar, li her warê ku jê re bû mêvan bandor kir, şopa xwe hiştin, ji şopa li malên me bêhtir. Ji ber vê yekê li çar parçeyên Kurdistanê gel ewladên xwe hembêz kir. Ji Qamişloyê heta bi Silêmaniyeyê, ji Amedê heta bi Torontoyê û bajarê Kolnê yê ku em lê dimînin, bi deh hezaran Kurdan di asteke bilind de xwedî lê derketin û pêşengên xwe bi rengekî hêja oxir kirin. Li pêşberî vê xwedîderketina mezin a gel, gotineke me nîne ku em lê zêde bikin. Lê dîsa jî em dibêjin; Erk û wezîfeya me ya ku vê meşa mezin a hevrê Ali Haydar Kaytan û Riza Altûn bi paşerojeke azad tacîdar bikin.
Kurd li her devera ku lê bûn mîna lehiyekê xwedî li nirxên xwe derketin, bi rengekî bêhempa xwe gihandin kok û cewhera xwe, xwestin xwe ji çavkaniya xwe nas bikin û bêne bîranîn. Ev yek nirxekî gelekî hêja ye ku berdêla wê nîne. Ya ku dibe para me ew e, ku em vî nirxî biparêzin, xwedî lê derkevin û zêde bikin. Em ê ji bo vê bijîn, li ber xwe bidin û xurt bin.
Bi vê wesîleyê di serî de malbatên şehîdan em dixwazin spasî û hurmeta xwe pêşkêşî hemû kedkarên tevgera azadiyê û her kesî bikin, ku li ser rêya wan meşiyan û bûn nefes ji me re.
Bi navê malbat û hevrêyên wan em soz didin. Em ê vê kevneşopiya nîv sed salî ku ji Kurdistana Azad re bû hişê jiyanê û bi ked û îradeyê hate avakirin, bi sedan salan dewam bikin. Di vê serdema têkoşînê de weke ku di bîranînên hevpar ên bi deh hezaran Kurdan de jî hate dîtin, em ê dilsozê Rêber Apo, şehîdan û nirxên xwe yên têkoşîna azadiyê bin û bi vî rengî bimeşin.
Şehîd Namirin.”
