Fermandarê Giştî yê HSDê Mazlûm Ebdî bi komek partiyên Kurdî yên bajarê Kobanê re pêşdeçûnên dawî yên girêdayî pêkanîna peymana 29ê Çileyê nîqaş kirin.
Li gorî malpera fermî ya Partiya Yekitiya Demokratîk (PYD), îro li navenda Meclisa Rêveber a Rêveberiya Kobanê di navbera Fermandarê Giştî yê Hêzên Sûriya Demokratîk (HSD) Mazlûm Ebdî û komek partiyên Kurdî yên bajarê Kobanê de bi rêya “zoomê” civînek hat lidarxistin.
Mazlûm Ebdî pêşketinên dawî yên der barê pêkanîna peymana 29ê Çileyê ya di navbera HSDê û hikumeta demkî ya Sûriyeyê de nirxand, li ser girîngtirîn pirsgirêk û pêşketinên di pêkanîna peymanê de rawestiya. Ebdî destnîşan kir ku pêvajoya entegrasyonê di hin waran de bi rêkûpêk berdewam dike, lê li hinên din rastî hin astengiyan tê, lê ev yek bandorê li ser berdewama pêkanîna bendên peymanê nake.
Ebdî behsa mijara aştiya navxweyî û rêbazên xurtkirina wê kir ku aramiya civkî misoger dike û jiyana hevbeş di nava pêkhateyên herêmê de diparêze.
Di dawiyê de beşdaran nêrînên xwe parve kirin. Di nêrînan de bal li ser pêwîstiya avakirina lêvegereke giştî li ser asta Kobanê hat kişandin ku nûnertiya tevahî beşên civakê bike. Li kêlek wê jî beşdaran gelek pirsên der barê rewşa bajarê Kobanê di çarçoveya peymanê de û mekanîzmayên pêkanîna wê li ser erdê de kirin.
