Fermandarê Giştî yê HSDê Mazlûm Ebdî civîna bi Wezîrê Derve yê Amerîkayê Marco Rubio re bi erênî nirxand û got, “Me di civînê de mijarên weke entegrasyon, siberoja Sûriyeyê û mafên gelê Kurd nîqaş kirin.”
Di çarçoveya Konferansa Ewlehiyê ya Munîhê ya 62emîn de, Fermandarê Giştî yê Hêzên Sûriya Demokratîk (HSD) Mazlûm, Hevseroka Daîreya Têkiliyên Derve ya Rêveberiya Xweser Îlham Ehmed, Wezîrê Derve yê hikûmeta demkî Esed El Şeybanî bi Wezîrê Derve yê Amerîkayê Marco Rubio re civiyan. Mazlûm Ebdî civîna bi Rubio re bi erênî nirxand û destnîşan kir ku mijarên entegrasyonê, siberoja Sûriyeyê û taybetmendiya gelê Kurd hatin nîqaşkirin.
Ebdî di bersiva pirsên rojnamegeran ên têkildarî rola hêzên navneteweyî di parastina lihevkirinan de diyar kir ku ev mijar hat nîqaşkirin, bersiv erênî bûn. Ebdî anî ziman ku wê gelek civîn îro û sibe ji bo şopandina mijarên hatine pêşkêşkirin li dar bikevin.
Têkildarî rewşa qadê ya li Rojava jî Mazlûm Ebdî bi bîr xist ku agirbestek heye, lê amaje bi hin pirsgirêkên ku xebatên çareserkirina wan tên kirin, kir û got dewletên Yekitiya Ewropayê nêzîkatiyeke erênî der barê pirsgirêka Kurdî de nîşan didin.
