Meclisa Gelê Efrîn û Şehbayê biryar da ku herêma ji aliyê çeteyan ve hatiye dorpêçkirin, vala bike. Meclisê destnîşan kir ku berxwedana wan didome.
Meclisê bi daxuyaniyekê diyar kir ku derketina wan a ji Şehbayê nayê wateya ku dest ji berxwedanê berdane û gotin: “Têkoşîn dê bi awayekî xurttir bidome. Dewleta Tirk a dagirker û çeteyên wê êrişî herêma Til Rifet û Şehbayê kir. Di van rojan de Hêzên Rizgariya Efrînê ji bo parastina me, berxwedaneke bêhempa nîşan da. Ji bo ku gelê me rastî komkujiyan neyê, ji bo ku kesên bêguneh neyên qetilkirin, me biryar da ku ji herêma ku ji aliyê çeteyên dewleta Tirk a dagirker ve hatiye dorpêçkirin,derkevin.
Berxwedan didome
Em teqez dikin ku derketina me ya ji herêma Şehbayê nayê wateya ku me dest ji berxwedana xwe ya rizgarkirina Efrînê berdaye; lê me di salên dawîn de tevahî mercên zehmet di kampan de tehemul kir û ji niha ve dê têkoşîna me bi awayekî xurttir bidome. Em dê ji bo rizgarkirina xaka xwe û ware xwe ji dagirkeran, hemû hewldanan bikin. Em spasiya Hêzên Rizgariya Efrînê dikin ku heya dawiyê parastina me kir û ji bo ku em bi ewle û keramet bijîn, fedakarî kirin.”
