Meclîsa Jinan a DBPê deklerasyona 8ê Adarê eşkere kir û da zanîn ku 8ê Adarê ji bo jinan sedema têkoşînê û îlankirina îradeya wan ya avakirina jiyana nû ye.
Meclîsa Jinan a Partiya Herêmên Demokratîk (DBP), bi beşdariya Hevseroka Giştî ya DBPê Çîgdem Kiliçgun Ûçar, deklarasyona 8ê Adarê Roja Jinan a Cîhanê bi dirûşmeya “Bi jina azad re ber bi civakeke demokratîk ve” eşkere kir. Endamên Meclîsa Jinan û aktîvîstên TJAyê tev li deklerasyonê ku li avahiya DBPê ya Mûşê hat eşkerekirin, bûn.
Metna ku bi zaraveya Kurmancî hatibû amadekirin, ji hêla berdevka Meclîsa Jinan a DBPê Bêrîvan Bahçecî ve hat xwendin.
Berîvan Bahçeçiyê destnîşan kir ku Meclîsa Jinan a DBPê 8ê Adarê weke rojeke dîrokî ya bîranînê nabînin û got: “Ev roj di heman demê de ked û berdilên hezar salan ên jinan, mîrasa berxwedana pêşengên me jinan, asta rêxistinbûyîna me, herî taybet jî; îdaya me ya paradîgmaya civaka demokratîk, jiyana ekolojîk û jina azad radixe li ber çavan. Bi van taybetiyên xwe em 8’ê Adarê digrin dest pêşwazî dikin. Bi vê mebestê, hemû jinann ku jiyana xwe ji dest dane, em bi rêzdarî û hesret bi bîr tinin û em ê tim xwedî li mîrateya ku wan li dû xwe hişt, derbikevin.”
‘Her roj bi sedan jin bi destê zilaman tên qetilkirin’
Bêrîvan Bahçeçî wiha berdewam kir:
“Êrişên ku di sedala 21’mîn de li dijî jinan pêk tên ne asayî ne, wek encamên pergala serdest a zilaman, bi rêxistinkirî pêk tên. Di her serdemên ku polîtîkayên şer kûr dibin, nijadperestî pêş dikeve, xizantî zêde dibe, herî pêş keda jinan, laş û îradeya jinan hedef tên girtin. Qetilkirina jinan, cînayetên bigumanbar, polîtîkayên bêcezahiştinê û mekanizmaya parastina kirayaran nîşan dide ku, jiyana jinan çawa bi rêk û pêk bê wate tê hiştin. Li gorî raporên fermî û yên xweser; her roj bi sedan jin bi destên zilaman tên qetilkirin, her roj di bin navê ‘’biguman’’ de cînayetên jinan pêk tên. Ev tablo, ne tesadüf e, yek ji encamên polîtîkayên bijarte ne.
Hewl didin jinan dorpêç bikin
Hewl didin jinan li malan, li kargehan li kolanan, li kampus û her deverên jiyanê bi pergaleke ku kedê nabîne, xebateke bêewle rewa dîbîne, aboriya xweser red dike û tundiyê bi her aliyê ve pêş dixe, dorpêç bikin. Armanc ew e ku; neheqiyê mayînde bikin, jinan ji qadên jiyanê û siyasî dûr bixin û civakeke ku serî ditewîne bixin meriyetê. Em baş dizanin ku; ev rejîma ku hatiye asta qirkirina jinan, di heman demê de civak demokratîk jî hedef digre. Li hember vê yekê, têkoşîna jinan jî ji sînorên herêmê derbastir kir û di asta gerdûnî û dîrokî de dewam dike. Di vî warî de salên dawî wek serdemeke ku jin li qadan, li kolanan, li her deverên jiyanê gotina xwe mezintir kirin, li dijî serdestiya zilaman berxwedana xwe geş kirin, derket pêş.
Êrişên li dijî şoreşa jinan bi piştevaniyeke mezin hat pûçkirin
Şoreşa ku li Rojava bi pêşengtiya jinan derket holê, rastiyek nişan da ku; gelên cîhanê dikarin bi hev re, bi wekhevî û azadî bijîn. Ev tecrubeya ku pêwendiya azadiya jinan û azadiya civakê bi aşkare raxist li ber çavan, rast rast bûye hedefa feraseta şer a serdestiya zilaman. Lê belê, her êrişên ku li dijî şoreşa jinan ya Rojava pêk tên, li her çar perçeyên Kurdistanê, li cîhanê bi berxwedan û piştevaniyeke mezin hatin bersivandin. Wêrektiya jinan a ku sînoran nas nake, xeta berxwedanê afirand. Şoreşa Jinan ya Rojava, modeleke civakî ye ku jiyana wekhev ava dike û wekheviyê diparêze.
Rêxistinî siberojeke azad e
Lêgerîna azadiyê carna li qadan bi dirûşmeyan, carna bi berxwedana dayikan, carna bi honandina kezî û porên jinan biwate dibe û belav dibe. Keziyên jinan di vî warî de nayê wateya şînê, wateya wê ew e ku; wek sembolekî hafizeya civakî zindî digre, berxwedan û rumetê mezintir dike. Lêgerîna yekitiya netewî û perspektîfa civaka demokratîk a ku îro dewam dikin jî, bi vê zanebûnê saz dibin. Em baş dizanin ku; hevkarî hêz e, rêxistinî pêşerojeke azad e. Rastiya Rojava vê rastiyê pir zelal nîşan dide ku, bi pêşengtiya jinan jiyanake azad û wekhev çawa tê avakirin û bi parastinê çawa mezintir dibe. Ji ber vê yekê; di parastina şoreşê de bi qasî avakirina wê, pêşengtiya jinan jî xwedî roleke mezin e. Li ser vê bingehê, em ê parastina Şoreşa Jinan ya Rojava û pêşxistina destkeftiyên şoreşê bidomînin. Li derdora vê armancê em ê her tim bi biryardarî bisekinin.
Pêvajoya Aştî û Civaka Demokratîk
Lêgerîna jiyana demokratîk û wekheviyê ya ku bi pêşengtiya jinan li Rojhilata Navîn pêk tê, car din nîşan da ku; heya ku jin nebin, aştî û demokrasî ne mumkun e. Li hember feraset û polîtîkayên di navbera gelan de dijmintiyê armanc dike, bi banga ‘’Aştî û Civaka Demokratîk’’ a ku Rêberê Gelê Kurd Abdullah Ocalan di 27ê Sibata 2025an de ragihand, pêvajoyeke nû destpêkir. Pêvajoya Aştî û Civaka Demokratîk ji bo gelan û jinan bingeheke siyasî ya nû avakir. Pêşxistina vê pêvajoyê jî, bi yekitiya netewî ya jinan û bi rêxistina jinan mumkun e. Wek Meclîsa Jinan a DBPê em civakbûyîna aştiyê li ser bingeha azadiya jinan digrin dest. Lewre, aştî ne tenê bidengkirina çekan e. Aştî, parastina mafê jinan, biewlekirina jiyana jinan û pêşxistina hemwelatiya wekhev û azad e. Her wiha aştî, ji siyaseta demokratîk re derî vekirin e. Ji ber vê yekê, ji bo pêvajo bi serkeftin bi encam bibe, ji bo Birêz Abdullah Ocalan azad bibe û ji bo civaka demokratîk bi gavên şênber ava bibe em ê têkoşîna xwe bidomînin.
Divê feraseta serdest a zilam xwe veguherîne
Hafizeya jiyana komunal a ku li ser xaka bereket a li erdnîgariya Mezopotamyayê bi hezar sal in kêlî bi kêlî şîn bûye, îro di berxwedana jinan de car din jîn dide. Bi hêza ku em ji berxwedana Zagrosan, ji mîrasa çanda xwedawenda dayik digrin; em jiyana ku koletiyê ji me re rewa dibîne red dikin. Di çarçoveya Bîrdoziya Rizgariya Jinan de em xweparastina cewherî pêş dixin, li dijî her êrişên ku li dijî jinan û xwezayê pêk tên, têkoşînê esas digrin. Em bi bawer in ku; azadiya ku di şexsê jinan de pêk bê, wê bi xwe re civakê jî azad bike û veguherîne. Jiyana azad tê wê wateyê ku; divê feraseta serdest a zilam jî di xwe de veguhertineke dîrokî pêk bîne. Jiyaneke azad û wekhev, encax bi pergaleke civakî ya ku zilam û jin bi hev re bihonînin, mumkun e.
8ê Adarê ji bo me sedema têkoşînê ye
Yekitiya Netewî ya Jinan meseleya herî stratejîk a vê serdemê ye. Ji nasname, bawerî, çand û gelên cur be cur yekitiya jinan a ku pêk bê; li dijî polîtîkayên dagirkerî û şer bersiva herî bi hêz e. Li der dora perspektîfa Konfederalîzma Jinan a Demokratîk, em li hember êrişên herêmî û kurewî, bi berpirsyariya avakirina jiyana hevpar tevdigerin. Di vê 8ê Adarê de jî em car din îlan dikin; berxwedana me çiqas mezin bibe, azadî jî wê ewqas belav bibe. Azadî çiqas belav bibe wê avakirina civaka demokratîk jî ewqas zûtir be. 8ê Adarê ji bo me jinan sedema têkoşînê ye; îlankirina îradeya me ya avakirina jiyana nû ye. Di serî de jinann Kurdistan û Rojhilata Navîn em bang li tevî jinann cîhanê dikin ku; werin em têkoşîna hevpar, berxwedana û pitevaniya xwe, her wiha rêxistinbûyina xwe û piş bixin, mezintir bikin. Bi hêza rêxistinkirî ya jinan ve em ê teqez pêşerojeke wekhev, azad û demokratîk ava bikin. Em bi hêvî û têkoşînê roja 8ê Adarê ya tevahiya jinan silav dikin.”
