Berdevka Meclisa Jinan a DBPê Bêrîvan Bahçecî destnîşan kir ku ew ê ji bo azadiya Rêberê PKKê Abdullah Ocalan têkoşîna xwe bidomînin û bi rasthatina 8ê Adarê dê li qadan bin û got ku divê jin îsal qadên 8ê Adarê bikin qadên azadiyê.
Berdevka Meclisa Jinan a Partiya Herêmên Demokratîk (DBP) Bêrîvan Bahçecî bi rasthatina 8ê Adarê Roja Jinan a Cîhanê û geşedanên di rojevê de li Buroya Şêwrê ya DBPê ya li Amedê civîna çapemeniyê li dar xist.
Bêrîvan Bahçecî bi bîr xist ku ew bi şîara “Li dijî qirkirina jinan em ê serî rakin, em ê azadiyê bînin” ber bi 8ê Adarê ve diçin.
‘Her roj jin dibin armanca êrişan’
Bêrîvan Bahçecî anî ziman ku ji aliyê desthilatdariya mêr ve her roj jin tên kuştin û wiha got: “Di her qadê de jin li ber xwe didin û serî radikin. Ji her aliyê ve pêvajoyêk bêhempa tê meşandin. Hem jî berxwedanek tê meşandin. Lê her roj siyasetmendar tên girtin bi taybetî jî siyasetmendarên jin tên girtin û dibin armanca êrişan. Û her roj zextên li ser Çapemeniya Azad a Kurd zêde dibe ji ber ku neheqiya li ser gelê Kurd tevahî cîhan dibîne. Naxwazin ku ev neheqî ji aliyê raya giştî ve were zanîn. Di heman demê de jî bi taybetî hevalên jin ên rojnameger dibin armanca êrişan û tên kuştin. Carek din em dibêjin em ê her tim wek jinên azadîxwaz wek Meclisa Jinan a DBPê tu carî nehêlin ku dengê Çapemeniya Azad were qutkirin.”
Bêrîvan Bahçecî di berdewamiya axaftina xwe de ev yek anîn ziman:
‘Tecrîda li ser birêz Ocalan didome’
“Di heman demê de hûn jî dizanin pevajoyêk behsa aştiye tê kirin heye, lê bi gelemperî dema em lêdinêrin em nikarin behsa pêvajoyê bikin. Ji ber ku cihê ku aştî lê hebe û behsa rawestandina şer bê kirin; divê li wir zarok, jin neyên kuştin, kes neyên girtin. An ji kesên kedê ji bo zimanê xwe didin neyên kuştin. Lê em her roj bi van tiştan re rû bi rû dimînin. Cihê ku şer şer lê hebê aborî xerab e. Heke ku tecrîd hebe her tişt tên rawestandin niha jî ew tişt bi destê desthilatdariya AKPê vê tê meşandin.
Divê birêz Ocalan azad bibe
Em behsa tecrîdkirina Rêberê Gelê Kurd birêz Abdullah Ocalan dikin. Di şexsê Rêberê Gelê Kurd de li ser tevahiya gel tecrîd heye. Ji bo vê jî heta ku tecrîd neyê rakirin û birêz Abdullah Ocalan bi awayekî fizîkî azad nebe, em nikarin behsa pêvajoyê bikin. Ji bo azadiya fizîkî ya Rêberê Gelê Kurd pêk were, her tim me gotiye û em ê bibijîn; em ê li ber xwe bidin. Lewma me her tim bedel dane. Heya ku azadiya fizîkî ya Rêberê Gele Kurd pêk were, em ê serî rakin.
Êrişî çand û zimanê me dikin
Li aliyekî behsa pêvajoya aştiyê dikin li aliyê din her roj gund û çiyayên me, çand û zimanê me qedexe dikin. Îro jî li Şirnexê ketin û derketina gelek herêman hat qedexekirin. Em dibêjin heke ku hûn behsa vê pêvajoyê dikin destê xwe ji ser çiya, ziman û çanda me bikişînin.
Sedsala jinan
Ji bo ku sedsala 21emîn bibe sedsala jinan em ê her li ber tundiya li ser jin û zarokan rabin û li dijî vê xwe bi rêxistin bikin. Bi hezaran jinên Kurd bi rêxistinkirina xwe li qadan têdikoşe û li ber xwe didin. Jin hêza xwe ji rêxistinbûnê digirin. Em ê têkoşîna xwe wek a Clara Zetkîn, Leyla Qasim, Sarayan berfireh û mezin bikin. Em ê tu carî ala têkoşîna wan li erdê nehêlin.
Vîna gelê Kurd desteser dikin
Êrişên li ser îradeya gelê Kurd nayên qebûlkirin. Di 2024an de hilbijartin çêbû gelê Kurd xwedî li vîna xwe derket û îradeya xwe danî holê. Lê dîsa desthilata faşîst naxwaze gelê Kurd xwe bi xwe bi rê ve bibe. Naxwazin gelê Kurd xwe bi rêxistin bike. Dixwazin gelê Kurd, jin û ciwanên Kurd hewceyî dewletê bibin. Em dibêjin destê xwe ji ser vîna gel û têkoşîna gel rakin. Hûn nikarin bi girtin û kuştinan vîna me desteser bikin. Lê em ê dest ji vîna xwe bernedin. Em ê her tim vîna xwe xurt bikin. Em ê dîsa şaredariyên xwe bistînin. Çima em dibêjin qeyûm talan e? Ji ber ku qeyûm êrişî vîna jinan dike, tiştên jin ava dikin dagir dike û digire. Qeyûm li şaredariyan zîhniyetek mêrperestî dide meşandin.
Em di 8ê Adarê de her qadê bikin qada azadiyê
Em ê wek Meclisa Jinan a DBPê li 11 bajaran, em ê li qadan bin. Em ê li Erzirom, Mûşê, Meletî, Semsûr, Mereş, Şirnex, Dîlok, Sêrt, Çewlig, Bedlîs û Depê kargehên-atolyeyên jinan pêk bînin. Em bi rasthatina 8ê Adarê bang li hemû jinan dikin ku qadan bikin qadên 8ê Adarê û qadên azadiyê û jinan. Em bi deng û reng û çanda xwed li qadan bin. Em li dijî hemû desthilatdaran dibêjin Jin Jiyan Azadî.”
