MED TUHAD-FEDê diyar kir ku banga Rêberê Gelê Kurd Abdullah Ocalan girîngiya dîrokê nîşan dide û ew piştgirê vê banga sedsalê ne û xwest ku Ocalan azad bibe.
Piştgiriya ji bo “Banga Aştî û Civaka Demokratîk” a Rêberê Gelê Kurd Abdullah Ocalan berdewam dike. Federasyona Komaleyên Hiqûq û Piştevaniyê ya Malbatên Girtî û Hukumxwaran a Medê (MED TUHAD-FED) li avahiya xwe ya li navçeya Bajarê Nû ya Amedê ji bo piştgiriya banga dîrokî civîna çapemeniyê li dar xist. Hevserokên MED TUHAD-FEDê Kerem Canpolat û Pinar Sakik Tekîn û rêveberên komeleyê û gelek malbatên girtiyan tev li civînê bûn.
‘Em piştgirê banga dîrokî ne’
Hevseroka MED TUHAD-FEDê Pinar Sakik Tekîn daxuyanî xwend. Pinar Sakik Tekîn diyar kir ku Rêberê Gelê Kurd Abdullah Ocalan di 27ê Sibatê de banga ji bo “Aştî û Civaka Demokratîk” kir û got: “Daxuyaniya birêz Abdullah Ocalan girîngiya dîrokê nîşan dide. Ev peyama dîrokî banga jiyanek demokratîk kir. Ev bang ji bo gelê Kurd û gelên herêmê ye. Ev bang di heman demê de çêkirina civakek ku jin û gel dikare bi hemî nasnameyên xwe ve bi azadî bijî ye. Em diyar dikin ku piştgirê banga birêz Ocalan in. Em ji bo her berpirsiyariyê amade ne. Li şûna şer û pevçûnan em aliyên banga sedsalê ne. Em ji vir gazî desthilatê jî dikin ku bi berpirsiyariya xwe rabe û êdî birêz Abdullah Ocalan azad bibe. Em gazî her kesî û her derdorê dikin ku li dora vê bangê werin ba hev.”
